Plie ka Kong Ampareen ia ka jaka sain Umsoh ha Jirang

Ka Myntri ka Koit ka Khiah ka Kong Ampareen Lyngdoh, hynne ka sngi ka la plie ia ka jaka sain umsoh ne Aseptic Pulp Processing Unit ba nyngkong ha jylla ba la tip kum ka Jirang Organic Agro Farmer’s Producer Company Ltd (FPC) ha Nonglum, New-Jirang, Ri-Bhoi District. Ha kane ka jingplie ia kane ka Processing Unit la iadonlang u MLA ka Jirang u Bah Sosthenes Sohtun, ka Deputy Secretary, Additional CEO jong ka MEGNOLIA, ED MBMA ka Saloni Verma, u Abhilash Baranwal u Deputy Commissioner jong ka Ri Bhoi district bad ka Kong Ibalahun Thangkhiew, CEO jong ka Jirang Organic Agro FPC bad kiwei.Ka Kong Ampareen Lyngdoh ka la ong, “Ki nongrep ki jong ngi ki long kiba kordor bha ha ka imlang sahlang khlem ka jingdon ka jong phi baroh, ngin ym lah ban pyndep ia ka iing ka jong ngi. Lada phi trei shitom bad phi don ia ka jingskhem jingmut ka sorkar kan ai ia ki jingdonkam bad kam don kano kano kaba ym lah ban poi sha ka thong”.

Ka Myntri ka la pynthikna ka sorkar ka long la kloi ban ai ki jingdonkam jong ki nongrep bad ki nongrep ki dei ban mih shakhmat ban pynpaw ia ki jingeh bad ka sorkar ka sngap ia ka jingdonkam jong ki paidbah. Ka la pynshlur ia ki nongrep ban shaniah skhem ha lade, ban trei shitom bad ban kdew ia ka sorkar ha ka ban shimkhia mardor ia ka jingdonkam bad ka la pynshlur ban sdang ia ka rep kaba khlem pyndonkam dawai bad ban leit phai sha ka rukom rep tynrai kaba la leh da ki longshwa manshwa.Ka la ong, ba ka Ri Bhoi District ka dei ka jaka kaba la kyrkhu da u Blei, ka la kyntu ia ki nongrep ba kin noh synniang ia ka bha ka miat bad ia ka ioh ka kot bad ka la pynthikna ba ka sorkar kan ieng ban ai jingkyrshan ia ki longiing jong ki nongrep.

U Bah Sosthenes Sohtun, ula ong, “Kum u MLA jong ka constituency, Nga sngew sarong ban iadon bynta ha kane ka prokram bad ban sakhi ia ka jingplie ia ka Aseptic Pulping Unit bad Mandarin Sorting, Grading, bad Waxing Unit. Nga iaroh ia ka jingtrei kaba khlem shongthait jong ki nongrep ban kyntiew bad rah shajrong ia ka rep ka riang da kaba pyninam ia ki mar kiba la pynmih ym tang ha ki iew kiba don hapoh ka ri hynrei wat shabar ri ruh.Ka Saloni Verma, ka la ong ba ka Jirang Organic Agro FPC ka la sdang ha u snem 2017, na ka jingsdang ba rit bad mynta ka don 433 ngut ki nongrep na ki 18 tylli ki shnong ha ka jaka rep ba 500 hektar bad ka la sdang ka jingshalan ia ki katto katne ki marrep bad mynta ka la jam shaphrang ban pynkhlain ia ka jingkhaii sha Delhi, Bangalore, Dubai.Ka Aseptic Pulp Unit, ka dei kaba la thaw lyngba ka Community Public Private Partnership (CPPP) model, kaba la kyrshan da ka International Fund for Agricultural Development (IFAD) bad ka Farmers’ Collectivization for Upscaling Production and Marketing System (FOCUS) scheme.