Plie u Conrad 125 tylli ki Community Centre ha Garo Hills

U Myntri Rangbah ka Jylla Meghalaya u Conrad K Sangma hynne ka sngi ula plie paidbah ia 125 tylli ki Community Centre ha kylleng ka Garo Hills, kiba la bei pisa na ka Meghalaya Livelihood and Forest Ecosystem Management Project (MegLIFE). Ha kane ka prokram la wan ban ïashim bynta da u Lamphang iingdorbar thawain u Thomas K Sangma, ki Myntri Sorkar kynthup u Marcuise Marak, u Rakkam A Sangma, u AT Mondal lem bad katto katne ngut ki MLA. Ïa ki Community Centre la plie paidbah na Dobakol Awemong hapoh ka Baghmara C&RD block ha South Garo Hills, ha kaba u Myntri Rangbah ka jylla u la don lang ban sakhi ïa kane ka jingplie paidbah. Ia ki Community Centren la shna ha ka jinglut kaba T.24 lak ha kaba T.13 lak la bei na ka projek bad T.11 lak na ka Jylla da ka jingthmu ban ai lad ïa ki paidbah ban sdang ïa ki kam bapher bapher, kynthup ïa ki jingthmu kiba lah ban pynmih pisa.

Ka projek MegLIFE kadei kaba la bei pisa da ka Japan International Cooperation Agency (JICA) da ka jingthmu ban pynneh pynsah ia ki khlaw ki btap bad ban kyntiew ia ka rukom im ha ki 500 tylli ki shnong ha kylleng ki 12 tylli ki district jong ka jylla Meghalaya. Ka projek kam shym la shna tang ia ki jaka pdeng jong ki paidbah hynrei ka la sdang ruh ia ki katto katne ki kam kiba lah ban wanrah ia ka ioh ka kot, kynthup ia ka jaka thung jingthung jong ki paidbah, ka jingthung jingtep, ki dam peit um kiba rit, ki pung ba la tih, ki tank plastik, bad ki tank buh um jong ka RCC. Ki IVCS bad ki SHG ki long ki bynta ba kongsan jong ka projek, ki ioh ia ki jingmyntoi bad ki don ka bynta kaba kongsan ha kaba pyntreikam ia ka. Haba kren ha kane ka sngi, u Myntri Rangbah ka Jlla u la ong ba kane ka projek ka phaikhmat eh ban pynim biang ia ki khlaw ki btap kiba la jot rathai, ban pynkhlain ia ka jingpyniaid ia ki marpoh khyndew, bad ban kyntiew ia ka jingim ha ki thain nongkyndong.

U Conrad u la pyntip ba kane ka projek ka ai bor ia ki paidbah ban shim ia ka jinglong trai ia ki khlaw ki btap, ki jaka, bad ki tyllong um. “Ngi kwah ban tei ia ka imlang sahlang kaba sdang ia ka jingiarap na ka bynta ka jingim kaba neh junom. Lyngba ka projek MegLife, ngi thaw ia ka jingsngewthuh ia ka mariang bad pynthikna ia ka ioh ka kot kaba neh lyngba ki kam bapher bapher” la ong u Conrad. Hapoh kane ka projek, ka thong ka long ban don 452 tylli ki community centre ha kylleng ka jylla Meghalaya. Da kaba ai khublei ia ka JICA kaba la ai ka jingkyrshan, u Myntri Rangbah u la pyntip ba yn sa pyndep sa 150 plus ki community centre ha Garo Hills. Haba kren halor ka jingdonkam jong ki Community Centre ban kyntiew iaka roi ka par haki thain kyndong, u Myntri Rangbah u la ong ba kane ka Project kan yntiew ia ka roi ka par jong ka imlang sahlang bad ban kyntiew ia ki jingthmu ban kamai jakpoh bad u la pynpaw ia ka jingthmu jong ka projek halor ka jingpynkupbor ia ki paidbah bad ka jingroi jingpar kaba neh junom. Ha kane ka sngi u Myntri Rangbah ula ïakren ruh bad ki paidbah kiba la wan sha kane ka prokram da kaba pyndonkam da ka kor digital.