Plie u Conrad ia ka Karkhana Saiñjri kaba nyngkong eh ha Meghalaya

U Myntri Rangbah ka Jylla u Conrad K Sangma hynne ka sngi, ula plie ia ka Centrifuged Latex Manufacturing Unit ne ka Karkhana Saiñ jri, ha Koksi Nengsat kaba hap hapoh ka Songsak C&RD Block bad kane ka Karkhana Saiñ jri kadei kaba nyngkong eh ha ka jylla Meghalaya bad ka baar ha ka thain Shatei Lam Mihngi.Ia katei ka karkhana saiñ jri, la pyniaid da ka Sister Rose, ka nongseng jong ka Mendipathar Multipurpose Cooperative Soceity (MMCS) bad la bei tyngka da ka Meghalaya Basin Management Agency ha ka jinglut jingsep kaba kot haduh T.18.8 klur bad kane ka project kan ai jingmyntoi ia kumba 3000 ngut ki nongrep diengjri kiba don ha kylleng ki bynta jongka Ri-lum Garo.

“Ka karkhana kan long ka jingkyrkhu ia ka Ri-lum Garo bad ia ka jylla baroh kawei, namar kan ai jingmyntoi ia kiba bun ki nongrep ia ki diengjri. Naduh ba ka Sorkar jong ngi kala shimti ia ka jingsynshar ha u snem 2018, kala buh hakhmat eh ban sngewthuh ia ka jingeh jong ki nongrep jong ngi bad ban shim ia ki sienjam ban kyrshan ia ki. Ngi lah sdang ia kiba bun ki prokram kum ka Focus, Focus+ bad CM Farm+ ban ai jingmyntoi ia ki nongrep ki jong ngi” la ong u Myntri Rangbah. U Conrad Sangma ula pyntip ba u Myntri Rangbahduh ka ri, ula buh ia ka thong ban kyntiew arshah ia ka kamai kajih ki nongrep. “Ha Meghalaya, ngi hap ban pynheh shuh shuh ban ia kaba arshah, da kaba peit ia ka jingshaniah tylli ha ka kam rep. Ban kynjoh ia ka thong ka jong ngi ban kynjoh ia ka ioh ka kot kaba $10 billion, ngi donkam ban kyntiew ia ka rukom im bad ia ki kabu na ka bynta ki nongrep”.

“Ki kam pynmih ia ki diengjri kala mad ia ki jingeh na ka jingshah khnoit na ki nongkhaii kiba wan nabar. Kane ka karkhana kan pynkylla noh ia kane bad kan ai jingmyntoi ia ki nongrep kiba don bynta ha kam pynmih diengjri. Ngi kyntu ia baroh ki nongrep ia ki diengjri ba kin leit ban die ia ka jri sha katei ka karkhana, kaban ai ia ka dor kaba biang bha bad ban ym pynlut ei ia la ka por” la ong u Conrad.“Ngi donkam ban pynshlur ia ki samla ba kin sdang ban seng kam lajong. Lyngba ka CM Elevate, ngi ai ka jingkyrshan ban sdang ia ki kam khaii pateng bad ban kyntiew ia ka jingsengkam lajong hapoh ka jylla” ula ong.Ha katei ka jingialang u Myntri Rangbah ula buh ruh ia u mawnongrim ban tei ia ka Fruit Dehydration Unit kaba nyngkong eh ha ka jylla, ka projek kaba kot T.23 Klur ia kaba yn tei pyndep ia ka ha u Naiwieng jong u snem ban wan bad kan lah ban saindur ia u soh haduh 7,400 MT man la u snem. Kane ka projek kan ai jingmyntoi ia palat 5000 ngut ki nongrep ha ka lynti kaba thikna da kaba shim ia ki soh ha ka dor kaba bha, kan pynduna ia ka jingduhnong ka jongki bad kan long ruh kum ka lad ban aikam aijam ia kiwei.