Plie u MLA ia ka paiñkhana ba T.16 lak ha Kiang Nangbah Stadium

Ka paiñkhana paidbah ba la shna ha madan Kiang Nangbah Stadium Jowai ha ka mang pisa ba 16 lak tyngka da ka jingiarap pisa mar shiteng na ka Rotary Club Jowai bad na ka 15th Finance Commission Award 2020-2021 jong ka Jowai Municipal Board, la plie ia ka hynne ka sngi da u MLA ka 2-Jowai u Wailadmiki Shylla ha ka jingialang ba la donlang ki dkhot ka Rotary Club, ki dkhot ka West Jaiñtia District Sports Association kum ka trai jaka, u SP ka West Jaiñtia Hills u S. Syrti, u K Passah District Sport Officer West Jaiñtia uba dei ruh kum u Asst Director Sports and Youth Affairs ka sorkar Jylla kiba shah khot sngewbha bad kiwei.

U Wailadmiki Shylla haba kren kum u kongsan u ong, kane ruh dei kawei na ka project ba donkam namar ha ki por ba mynshwa don paiñkhana tang na shiliang ka madan kumta ka jinglah ban shna sa kane kaba don mar shiliang madan kan sa long ka jingmyntoi bakhraw iaki paidbah. Ha kajuh ka por u ong ba naka liang jong u ruh ula pyrshang ban trei shitom katba lah khamtam ha kum kane ka por ba wan ka Meghalaya Games. Da kaba bynrap ruh ba don ka por haba iabeh than ban pynbit pynbiang iaki kam ba kham heh bad ba kham hakhmat eh juh klet ruh ia ki bynta ba kham rit wat haba dei kajuh hi ka jingdonkam. Kumta u sngewkmen iaka jingdon ka Rotary Club kaba long kum ka nongiarap ban mih shakhmat ban iatreilang naka bynta ban shna ia kane ka paiñkhana da kaba khmih lynti ruh ban ioh shuh shuh bun ki project haki snem ban wan.

Shuh shuh u ong ban shna dei kaba suk bha, hynrei kaba eh pat dei halor kumno ban pyniaid bad ban lehkhuid. Kumta u ngeit skhem ba ka Rotary Club kumjuh ka WJDSA ki la don lypa ka plan ba kumno yn peit bad pyniaid beit ia kane ka paiñkhana. Shwa kane la ioh ruh ka jingkren na u Assistant Governor Zone 13 Rtn. G. Pradeep, u Rtn R.E.Laloo, President Rotary Club Jowai, S.K.Lato Vice President Rotary Club Jowai, EMH Passah President WJDSA, u Rtn S.Laloo Secretary Construction Committee bad kiwei. Ha kane ka sngi ka Rotary ka la ai burom ruh ia ki dkhot kiba don bynta ban trei shitom halor ka jingjop kane ka project.