Plie u MR ia ka Mawsmai Banquet Hall ban khring ia ki nongshangkai pyrthei

Kum shibynta ban khring ia ki nongjngohkai ban ioh ia ki kamra sah kiba kyrpang bad kiba remdor, hynne ka sngi la plie ia ka Mawsmai Banquet Hall bad 32 tylli ki kamra sah kiba kyrpang (Luxury Suites) kiba la tei thymmai ha Hotel Polo Orchid Resort, Sohra. Ia katei ka Banquet Hall bad ki Luxury Suites la plie paidbah da u Myntri Rangbah ka jylla u Conrad K Sangma ryngkat ka jingdonlang u Myntri ka kam jngohkai u Bah Paul Lyngdoh, u MLA ka Sohra u Bah Gavin Miguel Mylliemgap, ki heh ophisar sorkar bad kiwei kiwei. Haba kren ha ka jingialang u Conrad K. Sangma ula iaroh ia ka Polo Towers Group bad ia u Chairman jong ka, kaba la kynthup ia kitei ki jaka sah kiba kyrpang bad remdor ha ka Orchid Resort Sohra bad ka jingbuh khnang ia kine ki jingtei kiba thymmai, ka pyni ba ka kam jngohkai ka la nangroi bad kiew shaphrang bad ka dei ruh namar ba ka jinglong jingman ka long kaba iahap bha bad ki briew kiba wankai.

Ula ong ba kane ka sienjam kam dei tang ba ka kyntiew ia ki jingdon jingem ha ka kam jngohkai hynrei ka pyni ruh ia ka jingiatreilang hapdeng ki shnong ki thaw, ka sorkar bad kiba don bynta lang ha ka kam. Ka jingwanrah ia ka jingshaniah bad ki nongshong shnong ka long ka dawbah ban tei bad kyntiew irat ia ka kam jngohkai bad ula iaroh ruh iaka jingsdang kynthup lang ia ki jingbam tynrai, ka kolshor bad ia ka riti dustur, ha kiba bun ki bynta ha katei ka Resort bad kino kino kiba leit ha katei ka Resort kin ioh ia ka lad ban tip shaphang ka Meghalaya.

“Ha ki snem kiba la leit, ka ioh ka kot ka Meghalaya ka long tang kumba 4.7 Billion US Dollar. Ha kine ki 5 snem kiba la dep, ngi la lah ban kyntiew ar shah ia kitei ki nombar bad ka jingkiew ka jong ngi ka long kumba 10.5 percent. Ka la don ka jingbei tyngka kaba heh ha ka kam jngohkai bad ngi khmih lynti ban kynjoh sha ka 10 Billion US Dollars hapoh u snem 2028” la ong u Conrad bad ula pyntip ba ka sorkar kam kwah tang ban shu kynjoh ia ka thong hynrei ka rukom treikam ka jongka ka long ban pynthikna bad kan don ka jingkiew ha ka ioh ka kot bad ka roi ka par kaba salonsar kaban kynthup ia ki briew kiba don ha ki bynta ki bapher bapher.