Plie u Myntri Rangbah ïa ka ICCC ha Umsawli

U Myntri Rangbah ka jylla u Conrad K Sangma hynne ka sngi, ula plie ia ka Integrated Command and Control Centre (ICCC) ha Umsawli, Shillong. U Conrad K Sangma haba kren ha ka jingialang ula ong, ba ka Integrated Command and Control Centre (ICCC) kadei ka jabieng jong baroh kawei ka Shillong Smart City bad kadei ka rynsan kaban lah ban pyniasoh bad kiwei kiwei ki kam ha kaba iadei bad ka Information Technology bad kadei ruh ka Application Programming Interface (API) kaba kham long kyrpang bad ka kane ka Center kan long kum ka atiar ha kaban iarap ha kaban shim ia ki rai kiba biang ha ka por kaba dei. Ula ong ba ka teknoloji ka long kaba bha katkum ka jinglah ban pyndonkam ia ka bad ka jingdon ia ka ICCC kam mut ba yn lait noh na kino kino ki jingeh hynrei ki jingtip kiba ioh lyngba ka ICCC bad ki jingpyndonkam ia ka yn lah ban shim ia ki rai bad ia ki sienjam ban wanrah ia ka jingkylla. Ula kyntu ia ki tnad sorkar kum ka IT, Urban, Police, Municipal ban pynkhreh kloi noh ia ki kyndon treikam bad ki kyndon jingbthah, khnang ba ki kor teknoloji kiba la ioh mynta, yn lah ban pyndonkam na ka bynta ban pynbha ia ka nongbah Shillong bad ban pynlong ia ka kum ka Smart City.

Ula iathuh ruh ba ka sorkar kala buh ia u Optical Fiber ha man la ki Block bad ki District kaban lam sha ka jingpyniasoh lang bad ka ICCC bad ki dang trei shitom ban pynthikna ba yn lah ban pyniaid ia ki Submarine Cable ha Shillong bad ka thong jong ka sorkar, ka long ban pyniasoh bad man la ki Block bad ki District ha ka IT network kaba pura. U Myntri Rangbah ula ong ba ka nongbah ka lah ban long kaba shempang lada baroh ki iatreilang ym tang ban pynlong ia ka Smart City hynrei wat ban pynlong syndon kum ka nongbah kaba khraw. Ha kane ka jingialang la iadonlang u Symbud Myntri Rangbah ka jylla u Bah Sniawbhalang Dhar, u Chief Secretary ka jylla u Bah DP Wahlang, ka Director General of Police ka Kong Idashisha Nongrang, u Commissioner & Secretary ka Urban Affairs u Vijay Kumar bad u Commissioner & Secretary ka Information Technology u Pravin Bakshi, ki Rangbah Shnong bad ki heh ophisar sorkar.

Ki bynta kiba kongsan ha ka ICCC Shillong ki kynthup ia ka ICCC platform, ICCC ryngkat bad ka Monitoring Workstation kaba don ia ka Video Wall 30 Seater Operator bad 20 tylli ki Workstation, Data Center, ka Collaboration Solution bad ka Contact Center, City Network, City Surveillance System ryngkat lang bad ka Video Analytics, Solid Waste Management System, Intelligent Traffic Management System, City Wi-Fi, Public Address System, Emergency Call Box bad kiwei kiwei. Ia ka City Surveillance System la dep ban buh ha ki 96 tylli ki jaka, katba ia ki Smart Poles la buh ha ki 20 tylli ki jaka bad ia ka Variable Message Display la buh ha ki 20 tylli ki jaka.