Plie u Myntri Rangbah ïa u mot dur tynrai Khasi ka SSMP

U Myntri Rangbah ka Jylla u Conrad K Sangma hynne ka sngi, ula plie paidbah ia u motdur tynrai u Khasi jong ka Seng Samla Mawlai Pyllun (SSMP)-kum ka dak jongka jingrakhe ia ka jingdap 20 snem jong ka jingiaid lynti jongka SSMP.
Ia kane une u motdur tynrai la tei ha Rymbai Fuel Station, ha Mawlai Mawiong Rim ha kaba la iadonlang ki nongialam jonga ka SSMP, ki nongilam shnong bad kiwei kiwei.
Ka Dorbar Shnong bad ki seng Seng Samla jong ka thaiñ, kila aiti ruh ia ka dorkhas ha u Myntri Rangbah ka Jylla ha kaba kila pynpaw ïa ki jingeh bad ki jingdonkam hapoh ka shnong Mawlai.
U Myntri Rangbah haba kren ha ka jingialang, ula ai khublei ia ka Seng Samla Mawlai Pyllun halor ka jingkynjoh ia ka 20 snem ha ka jingai jingshakri bad kumjuh ruh ban noh synniang ia ka shnong Mawlai baroh kawei.
“Nga kyrmen ba kane ka jingrakhe jong ka Seng Samla Mawlai Pyllun kan ai mynsiem ia ki samla jong ngi ba kin long kata ka jingkylla” la ong u Myntri Rangbah bad ka bynrap ba ka jingshna dur tynrai kaba pyni ïa ka kolshor jong ki Khasi kan long ruh kum ka jingkhring bad ka jingpdiang sngewbha ïa ki nongwan jngohkai pyrthei kiba wan rung sha nongbah Shillong.
Ula ong ba ka Sorkar ka iengskhem ha nongrim treikam ban pynthikna ia ka jingkhmih bad jingshimkhia ia ki jingeh jong baroh ki briew ha ka imlang sahlang bad ula ong ba ki samla jong ka imlang sahlang kidei ki kynhun kiba kongsan eh bad ki kynhun ha ki shnong ki thaw kum ki seng samla ki long kiba kongsan bha ym tang ia ka lawei, hynrei ia ka jylla baroh kawei.
U Conrad ula kyntu ia ki samla ba kin shimkabu ia ki prokram bad ia ki skhim jong ka sorkar jylla kiba la mang kyrpang na ka bynta jongki samla khnang ba kin kiew shaphrang ha ka jingim ka jongki.