Ha kawei ka jingjia kaba sngewsih, kawei ka longiing ka la mad ia ka apot sepsngi hadien ba ki thylliej kiba shyrkhei ki la ioh ban bam duh ia kawei ka iing kaba la buh ban pyllang ia u synsar, kane ka jingjia ka la jia ha ka shnong Umsmu hapoh ka Umsning Police Station, Ri Bhoi District.
Katkum ka jingtip ba la iohlum, la iathuh ba kane ka longiing kaba la mad ia katei ka apot sepsngi ka dei jong ka Kong Merrilin Mawlong, kaba shong basah ha ka shnong Umsmu bad kaba im ruh da ka kam rep synsar. Na ka liang ka Kong Merrilin Mawlong, ka la iathuh, ba kane ka jingjia ka la jia hynnin ka sngi ha ka por 2 baje ha ka por ba kim shem la poi pyrkhat ha kaba ka ding kaba la klang bha bad ka la ioh ban bam duh ia baroh ki synsar kiba la pynlang ha ka iing kaba ki shong ki sah.
La iathuh ruh, ba ha kane ka jingjia pluh ding, nalor ka iing bad u synsar ba ki dang shu dep ban ot bad ruh ia solar panel bad ki tiar iing kaba la wanrah ia ka jingduhnong kaba khraw ia ka iing ka sem. Shuh shuh la pyntip, ba halor kane ka jingjia pluhding kaba la jia kynsan la suba jur ba lah ban don ki riew shimkabu kiba la thang ia ki phlang tyrkhong kiba la pynlang da kane ka longiing ha kawei ka jaka.