Puk leit tur ka KSU sha ophis Syiem Maharam ban pyrshah ai jaka ïa ki BSF

Ka Khasi Students Union (KSU) South West Khasi Hills District mynta ka 30 tarik Nailar 2025 ka la pynlong ia ka jingiaid paidbah kaba kyndit bad leit tur ruh sha ka ophis jong u Syiem Hima Maharam kaba don ha Mawkyrwat ban dawa ba u Syiem udei ban khot noh mardor ia ka Dorbar Hima bad ban pyndam noh ia ka jingthmu ban ai ha ki BSF ia ka jaka jong ka Hima kaba don hajan ka Wah Mula, Ranikor Civil Sub-Division kaba ju pyndonkam da ki khun ki hajar ban rep ban riang mynta la bun phew snem. Hadien kiwei pat ki kynhun sengbhalang kiba kynthup ia ka FKJGP, HITO, HYC, HNYF bad ka HANM ki la iasoh lang ha ki jingiakhih.

Kumba lai kynta tam eiei u Syiem ka Hima Maharam, u Paiem Niandro Syiemiong um shym la mih satia na ophis jong u katba kitei ki sengbhalang ki dang pyrta pyrta pyrshah ia u bad ia ka Executive Dorbar ka Hima Maharam. Hadien kata na ka liang u Syiem u la khot iakren ia kit katto katne ngut ki nongialam hapoh ophis jong u. Haba kren ha ki nongthoh khubor hadien ka jingiakynduh ia u Syiem, u President ka KSU South West Khasi Hills District, u samla Forwardman Nongrem u la ong ba na ka liang ka seng ryngkat kiwei de ki sengbhalang ki kren da kaba shai ia u Syiem ba kin aipor haduh ka sngi nyngkong jong ka taiew ban wan ba un lum ia kata ka Special Executive Dorbar bad ban pynbna ba ka Hima ka la weng noh ia katei ka jingthmu ban ai jaka ia ka jaka rep jong ki Khasi ha ki shipai.

U la maham tyngeh ba lada u Syiem um lah ban leh ia kata, ka seng ryngkat kiwei pat ki sengbhalang kin leh da kaba tyngeh.  Haba kylli la ki sengbhalang kin pyrshah ne em ban ai jaka ha kiwei pat ki jaka, u samla Forwardman u la ong, ba lada u Syiem bad ka Executive Dorbar ki ai ia kino kino ki jaka, kiba ktah ia ki khun ki hajar, ka KSU da leilei kan ym ailad.