Ka ophis jong ka MeECL ka la jan kulmar thlim hadien ba ki paidbah nongthang bording ki la wan tur hapoh katei ka ophis namar ka jingphah siew bai bording jong ka tnad MeECL da kaba oh dor kaba heh bad don kiba la shah phah shithi ban hap siew ia ka bai bording kaba la kot da ki lak tyngka khlem da ai kano kano ka jingpynshai ryngkat ka jingmaham ban aiti sha ki bor ka aiñ lada kim lah ban siew. La ong ba kawei ka longïing kaba la dep shah ot bording naduh kham mynshwa hynrei mynta pat ka la ioh pdiang pynban ia ka bai bording kaba la kot haduh 1,14000/- ( shi lak khatsaw hajar) bad kane ka la pynlyngngoh jor ia katei ka longïing ba balei ka MePDCL ka dang kheiñ bad phah siew bai bording wat haba la shah ot. La ong ba ki don pat kiwei pat ba ju siew bai bording man la u bnai hynrei ki kyndit ban iohi ba la shah phah siew biang ia ka bai bording ba la lang da ki phew hajar.
Kiba kum kine ki jingjia ki ju iai jia na ka por sha ka por lyngba ka jingiai wan pynsngew ki paidbah ia ka jingleh jong katei ka tnad hynrei kumba ka paw hi ka I kumba ka MeECL ka la shu dawa pisa na ki paidbah, ym shuh ba ka phah siew ia ka bai bording katkum ba ki paidbah ki pyndonkam. Ym tang kane, hynrei ha kine ki khyndiat sngi, la sakhi ba ki nongtrei katei ka tnad ki la dawa pisa ruh na ki paidbah ha ki thaiñ Langpih na ka bynta ban ai connection bording hynrei ki paidbah ki la pynpaw ba kitei ki nongtrei ki la shu shim tang ia ka pisa katba kim shym la pynrung ia ka kyrteng jong ki hapoh ka ophis bad kim shym la ioh hi ruh ban tan bording kaba thikna.
Ka jingkylli ka mih mynta ba hato kane ka jingleh ka dei na ka jingleh shukor ki nongtrei lane ka dei kaba ka ophis lyngba ki ophisar ki don jingtip lem halor kane, namar kumba ka paw, ki kam torti hapoh ka MeECL ki paw bad ki jia na ka por sha ka por hynrei I kumba ym don ba shimkhia ban weng ia kine ki kynrum kynram. Halor kane ka bynta, ka seng HNYM hapoh ka jingialam jong u Bah Tailan Lyngkhoi ka la leit ban tuklar lem ia kane ka kam bad pan jingshai ruh na ka tnad MeECL. Kumta, na ka liang ka seng ka dawa ia ka tnad MeECL ba ka dei ban shimkhia bad leh ei ei mardor halor kane ka kam, na ka bynta ka jingshngain jong ki paidbah.