Pulom ka jingthmu khynra ki pulit ka Assam ia ka USTM

Ki bor pulit ka Ri Bhoi District mynta ka sngi ki la khanglad noh ia ka jingthmu jong ka kynhun ki pulit ka Assam ban leit khynra ia ka skulbah University of Science and Technology Meghalaya (USTM) kaba don ha Baridua, Killing, Ri Bhoi District. Lah ban kdew ba ki pulit ka Assam, kiba dang pynlong ia ka jingtohkit halor ka jingkynnoh donkti jong u Chancellor ka USTM u Mahbubul Hoque ban leh thok ha ka examination CBSE Klass XII Physics ha kawei ka jaka pule kaba don ha Patharkandi, Assam, ki pulit ka Assam ki la kem ia u Hoque ha ka 22 tarik u Rymphang 2025 bad ruh ia kiwei pat ki nonghikai kiba la kynnoh donkti ha kane ka kam leh thok.

Haba ioh ban ia kren bad u Superintendent of Police ka Ri Bhoi, u VS Rathore, u la iathuh, ba ki bor pulit ka Ri Bhoi District, ki la ioh jingtip ba ki pulit ka Assam ki la poi ha Khanapara Police Station da ka jingthmu ban pan ia ka jingiatreilang ban leit khynra ia ka skul USTM halor ka mukotduma ba la ujor pyrshah ia u Chancellor hapoh ka Karimganj Police Station. U iathuh ruh, ba na ka liang ki pulit ka Ri Bhoi District kim shem la treh ban ai ka jingiatreilang bad ki pulit ka Assam halor ka nongrim ban iada ia kano kano ka jingmih ki kynrum kynram (Law and Order) bad ruh kumjuh la bthah ia ki pulit ka Assam ba ki dei ban ioh shwa da ka Search Warrant na ka ïingkashari shwa ba kin pynlong ia ka jingleitkhynra ha kino ki bynta jong ka jylla Meghalaya.

Shuh shuh ruh, la iathuh ba hadien ba ki pulit ka Assam kim shem la ioh bor ne ka jingiatreilang na ki pulit ka Meghalaya kumta ki la hap ban leit phai thylli noh sha la ka jylla.