Pyllait ka KSU ia ka Stamp Soso Tham ba la ithuh da ka Post Office ka Sorkar India

U President ka Khasi Student Union (KSU) u samla Lambokstar Marngar haka jingdon lang ka Senior Superintendent of Post Offices, Meghalaya Division ka Anjali Verma u la pyllait paidbah ïa ka Stamp kaba la shon ha ka kyrteng u Myllung Soso Tham. Ia ka Stamp jong u Soso Tham la ithuh bad pynmih da ka tnat Ïingdak lane ka Post Office ka Sorkar India. Ia kane la Stamp la pyllait paidbah hynne ka sngi haka program kynmaw burom iaka lyngkhuh sngi ïap kaba 84 snem jong u Soso Tham. Ha kane ka sngi la don lang u General Secretary u samla Donald V Thabah, ki dkhot ka KSU Mawlai Circle bad KSU NEHU Unit bad ki samla pule nalor kiwei kiwei de. Ki nongialam ka KSU kila buh syntiew ruh ha u mot jong u Soso Tham ha phyllaw jong ka skulbah North Eastern Hill University (NEHU).

Haba kren kane ka sngi u samla Lambokstar u la ong ba kane ka jingkynmaw burom ia ka lyngkhuh sngi iap jong u Soso Tham bad kiwei ki riewkhraw ka jaidbynriew, ka long ban ai burom namar ka jingnoh synniang jong ki sha ka Ri bad ka jaidbynriew. U samla Lambokstar u la kynthoh tyngeh ia ka Sorkar Jylla kaba ai bor pura ia ka Invest Meghalaya Agency (IMA) ban thied jaka bad ai wai sha ki nongwan bei pisa. U la ong ba ha kylleng ka Ri Khasi-Jaintia kynthup ha Nongbah Shillong la dap da ki ktem shipai, ki ba ju mlien ban pynthud ia ka leit ka wan ia ki nongshong shnong ha ki bynta bapher bapher hynrei ka long kaba lyngngoh ban iohi ba ka Sorkar ka pyrshang ban bynda ban lilam ia ki jaka puta bri u Hynniewtrep.

U President u la ong baka seng kan pyrshah jur ia kane ka jingthmu ka Sorkar bad u la kynnoh baka jingpynshai naka Sorkar halor ka IMA, kadei tang ban tap eitmiaw.