Pyllait ka sorkar ia ka kali ban ialap pynneh mariang bad iada tyllong um

Ka Myntri ka tnad ka rep ka riang ka kong Ampareen Lyngdoh hynne ka sngi ka la khaweh lama ia ka kali Watershed Yatra Awareness ka ban leit ai jingpynshai sha ki nongrep ban pynneh pynsah bad ban iada ia ka um.
Ia ka jingialang halor kane, la pyllong ha phyllaw ka State Central, Shillong ha kaba la wan iashim bynta ruh ki Self Help Group (SHG) na kylleng ki jaka kiba pyniaid ki nongrep.
Haba kren ha kane ka prokram, ka kong Ampareen ka la ong ba ka jingmut ba kongsan kane ka prokram ka long ban iada ia ka um da kaba iatreilang bad ki nongrep lyngba ki SHG.
Kane ka kali Yatra ka dei baroh kawei ka ri India, kaba ka sorkar ka la buh thong ban leit sha ki nongrep ban ai jingpynshai.
“Ka la ong ba ka jingmut ka long ban lah ban thung ia ki mar rep bun tylli ha ki lyngkha khnang ba ki nongrep kin ioh jingmyntoi hynrei ban lah ban leh ia kane, ka donkam ia ka um kaba biang ha ki lyngkha.
Kane ka kali Yatra ka dei baroh kawei ka ri India, kaba ka sorkar ka la buh thong ban leit sha ki nongrep ban ai jingpynshai,” ka la ong.
Ka Myntri ka la ong ba ka sorkar ka la shna 1390 tylli ki jaka pyllang um bad la leh ia kane ka jingpynneh ia ka mariang kumba 3000 hectar.
“ Lada ym don ka jingpyllang um , ka jylla kan sa syllang namarkata donkam ka jingiatreilang jong baroh,” ka la ong.
Ka Kong Ampareen ka la ong ba kane ka Yatra kadei kaba baroh kawei ka ri ki shim bynta ha kane ka prokram bad baroh ki tnad sorkar ki iatreilang na bynta ban shim bynta ha ka jingpynneh pynsah ia ka um bad ka mei mariang.
Katkum ka jingong ka kong Ampareen, ka sorkar kan hikai ia ki nongrep ym tang ban trei ha ki lyngkha jongki hynrei kin don ka jingiatreilang hapdeng bun lyngba ki Cooperative Society kiba don kumba 2000 tylli eiei ha kane ka jylla ban kyntiew ia ka kam rep.
“Mynshwa ki lum kila sdang syllen lut na ka jingthang ia ki khlaw ka jingpom ia ki dieng hynrei mynta ka sorkar ka la hikai da kawei ka lynti ban iada ia ka mariang,” ka la ong.
Ka la ong ba bynta kane ka Yatra, ka pisa ka wan na ka sorkar India bad ka sorkar jylla ka iakhun ban pynneh pynsah ia ka um lyngba ka jingiatreilang ki tnad sorkar bapher bapher.