Pyllait u MR 2 tylli ki kot halor ki Nongprat Lynti ka Meghalaya

U Myntri Rangbah ka jylla u Conrad K Sangma ula pyllait paidbah ia ar tylli ki kot ba la ai kyrteng His Story: Trailblazing Men of Meghalaya bad His Footprints in Time: Meghalaya’s Trailblazers and the Making of Modern India ha ka jingïalang kaba kyrpang kaba la long ha ophis treikam ka jong u ha Secretariat. Ia kine ki kot la pynwandur bad pynbeit bniah da u Dr. David Arnold Kharchandy uba long u Secretary jong ka Centre for Historical Research Synod College. Ha kane ka jingpyllait ia kitei ki kot la ia donlang u Rev. E.R. Kharkrang, President jong ka Governing Body, Ka Principal ka kolej ka Dr. G. Lyngdoh, ki nonghikai bad ki nongtrei ophis na ka kolej. Ka kot His Story: Trailblazing Men of Meghalaya, ka dei ka kot kaba riewspah bha ha ki dur ba la kyrshan da ka jingai jingiarap ba kyrpang jong u Myntri Rangbah ka Jylla. Ka pyni ia ki jingthoh shaphang ka jingim jong ki laiphew hynniew ngut ki shynrang kiba kyrpang kiba la ai ki jingnoh synniang kiba thymmai ha ki bynta bapher bapher kum ka sain pyrthei, ka pule puthi, ka niam, ka jingshakri paidbah, ka jingiakhih na ka bynta ka mariang, ka kam shipai, bad ki kam shna jingshna. Lyngba ki dur bad ki jingïathuhkhana kiba lah ban ïoh, ka kot ka long kum ka jaka buh jingthoh kaba paw bad kaba ai mynsiem ïa ka jingïaid lynti jong ka Meghalaya ha kane ka juk mynta.

Katba ka kot His Footprints in Time: Meghalaya’s Trailblazers and the Making of Modern India, ka dei ka kot ba la lum lang ia ki laiphew san tylli ki jingthoh jong ki riewstad kiba wad bniah ia ka jingim bad ki pateng jong ki briew shimet kiba ka jingtrei jong ki ka la pynwan dur ia ki jingiathuhkhana ha ka thain bad ha ka ri hi baroh kawei. Ka kot ka kynthup ia ki jingthoh shaphang ki nongprat lynti kum u Purno A. Sangma, u Prof. G. G. Swell, u Rev. J.J.M Nichols-Roy, u Captain Clifford K. Nongrum, u Neil Nongkynrih, u Rev. Dr. Amos C. Moore bad kiwei kiwei. Ka kot ka shim na ki tyllong khubor ba la buh lypa, ki histori ba la kren da ka ktien, bad ki jingwad bniah ha ka lyngkha ban pyni ïa ka dur kaba bniah jong ka jingnoh synñiang jong ka Meghalaya sha ka jinglong ba mynta jong ka India. Haba kren ha kane ka jingïalang, u Myntri Rangbah ka Jylla ula ïaroh ïa ka Centre for Historical Research Synod College halor ka jingshimkhia ban buh jingthoh ïa ka pateng jong ki nongprat lynti jong ka jylla. Ula ban jur ia ka jingdonkam ban pynneh pynsah ia kum kine ki histori kum ka tynrai jong ka jingithuh bad jingai mynsiem, khamtam ia ki samla jong ka jylla Meghalaya.

Baroh ar tylli ki kot ki ieng kum ki mawjam ha ka jingpule bad ki spah jong ka kolshor, kiba pynskhem biang ia ka jingaiti jong ka Synod College ia ka histori paidbah bad ka jingpynneh pynsah ia ki jingiathuh khana jong ka thain bad la khmih lynti ba kin long kum ki lad jingiarap kiba kongsan na ka bynta ki samla pule, ki nongwad bniah, ki nongthaw polisi bad ia ki paidbah.