Pyllait u MR ia ki kali kit nongpang ka PA Sangma Medical kolej

U Myntri Rangbah Conrad K Sangma ryngkat ka Myntri ka Koit ka Khiah ka Kong Ampareen Lyngdoh hynne ka sngi ki la pyllait paidbah ia ki Health Shuttle Service ne ki kali kit nongpang jong ka PA Sangma International Medical College & Hospital (PIMC) ban ai jingshakri ia ki nongpang ha ka jylla. Ka jingshakri kan sdang shwa da ki 10 tylli ki kali bad yn buh kyrpang 5 tylli ki kali na bynta ki jaka nongkyndong bad 5 tylli ha jaka sor bad yn pyntreikam 2 tylli ha ka sor Shillong, Ka jingthmu ka long ban ai jingshakri ia ki nongpang ban kit ia ki ryngkat bad ki nongap sha ki hospital.

U Conrad K Sangma haba ai jingkren ula iaroh ia ka PIMC halor ka jingshim ia kane ka sienjam ba donkam bad ula ong, wat hapdeng ki jingeh ban seng ia ka Medical College, hynrei ka USTM ka la shim ia ki sienjam ba biang ban ai ka jingshakri ia u paidbah ha ka koit ka khiah. Ula bynrap ka jingshakri kine ki kali kan ym ai jingmyntoi tang ia ki paidbah na nongkyndong hynrei kan pynkhlain ia ki lad ai jingsumar ha nongbah Shillong bad ha kiwei ki jaka.

Katba ka Kong Ampareen Lyngdoh ka la ong, ba ka leit ka wan ka dang don ka jingeh kaba long u mawjynthud ban pynpoi mardor ia ki nongpang sha ki jaka sumar bad kumta ka jingdon kine ki kali kit nongpang kan pynsuk ia ka leit ka wan ki nongpang. Ha kane ka jingpyllait paidbah ia kine ki kali kit nongpang la iadonlang u Chancellor ka USTM u M Hoque, ki dkhot ka skulbah bad kiwei kiwei.