Pynbna ka LTO& DA Nongpoh ia ka Taxi Stand kum ka ‘No Smoking Zone’

Kum kawei na ki lad ban ai jingïada ïa ki paidbah nongleit nongwan bad kumjuh ruh ïa ki Passanger kiba shong taxi, Ka Local Taxi Owner & Driver Association, Nongpoh Region mynta ka sngi ka la pynbna paidbah ba naduh mynta ka sngi ka 11 tarik Naiwieng Ïa ka Jaka Ïeng Kali Taxi ha Nongpoh kaba kamai Nongpoh sha Byrnihat la pynbna kum kawei na ki jaka “No Smoking Zone” ka ban ym shah shuh ban dih Duma/sikret bad lada lap ïa kino kino kiba leh pyrshah yn dain kuna bad yn leh tyngeh katkum ki kyndon aiñ.Ïa katei ka rai la pynlait paidbah da ka kynhun ki Nongñiah Taxi Nongpoh Region ha ka jingialang kaba la pynlong ha Dorbar Hall, Nongpoh ha kaba la wan ban ïa sakhi lang da u Akash R Marak Assistant Commissioner ka Ri Bhoi kum u kongsan bad nalor u kongsan la ïadonlang ruh da u Bah John Peter Nongrang MVI ka Nongpoh, Dr. W. Hynniewta Senior Dental Surgeon ka Civil Hospital, Nongpoh, U B Thangkhiew SI Second Incharge ka Nongpoh Trafic, u President ka RBPC Bah Jeson Nongrum lem bad kiwei kiwei..

Nalor katei ka rai, Ka Local Taxi Owner & Driver Association, Nongpoh Region ka la pynlait paidbah ruh ïa u Helpline Number jong ka kynhun ka ban ai ïaka jingshakri sha ki paidbah bad ha kajuh kapor ki la pynlait ruh ïaki ID Card jong ki Nongñiah Taxi kiba don hapoh ka kynhun ka ban pynshngain ïaki nongleit nongwan haba ki kiew haki Taxi Kamai.Hadien ka program kaba la long ha Dorbar Hall, Nongpoh ki Nongialam jong katei ka kynhun ki la leit syndon ban wah ïaki Signboard haka jaka ieng Kali jong ki kaba la thoh shai ba ym shah ban dih Duma lane sikret ha katei ka Stand.Haba kren sha ki lad pathai khubor, naka liang u bah Vincent Sohkhwai u President ka Association, u la iathuh ba naduh kane ka sngi ïaka stand kamai Kali jong ka Association ki la pynbna kum ka No Smoking Zone kaba ym shah shuh iano iano ban dih Duma la kadei iaki Passanger, Ki Nongñiah Taxi ne iaki paidbah kiba iaid ba ieng lyngba katei ka jaka bad lada don kiba leh pyrshah kin leh tyngeh katkum ka Aiñ.

U la ïathuh, Ka pynmih ïa u ID Card jong ki Nongñiah Taxi kiba don haka Association ka long ban wan rah iaka jingshngain iaki nongleit nongwan namar hakiba bun ki jaka ki la ju jia bun ki jingjia kiba pynlong iaki paidbah ba kin sier mynsiem haba ki leit jingleit, bad kane ka ID Card kan pyntikna ba uno uno uba don iaka u dei u Driver Taxi jong ka kynhun bad u bym don iaka ID Card un ym lah ban kamai taxi lyngba katei ka stand.Shuh shuh u la ong, u Helpline Number jong ka Association kaba ki la pynlait mynta ka sngi kan ai ka jingshakri sha ki passanger kiba donkam bad kiba don hapdeng ka jingeh, bad kino kino kiba donkam iaki jingiarap naka kynhun jong ki, ki lah ban phone ha ki Helpline number kiba la pynlait paidbah mynta ka sngi.