Pynbna kyrtong ka HSPDP kynthup u nongthoh khubor bad ka hynmen u Myntri Sorkar

Ka Hill State People’s Democratic Party (HSPDP) hynne ka sngi ka la pynbna sa ïa 3 ngut ki kyrtong ki ban iakhun ha ka ilekshon MDC sha ka Khasi Hills Autonomous District Council (KHADC). Kine ki kyrtong ki kynthup u Bah Starfing Jove Langpen Pdahkasiej-Mawsynram, ka Kong Phinda Warjri- Marthadraishan  Pariong bad u Bah Srally Rashir- Mawshynrut constituency. Ïa ki kyrteng jong ki kyrtong la pynbna da u President ka HSPDP u Bah KP Pangniang ha ka jingdonlang ki MLA bad ki nongkitkam ka Party.

Haba kren sha ki lad pathai khubor u Bah KP Pangniang ula ong, ba ka thong jong ka Party ha kane ka ilekshon MDC ka dei hi ban iada ia ka jinglong kyrpang ka synshar khaddar naduh ki Dorbar Shnong, ban pynneh pynsah ia ka jinglong kyrpang ka rukom bat khyndew. “Ka HSPDP naduh ba la seng ha u snem 1968, ka ïeng ha ka nongrim ban iada ia ka khyndew ka shyiap khamtam ha ki jaka ba hap ha ka jingkajia pud bad ka Assam. Ngin bteng ban iakhun bad dawa na ka Sorkar Jylla ban pyndep noh ia ka jingïakren pynbeit pud bad ka Assam” la ong u Bah Pangniang.

U Bah KP Pangniang ula ïathuh ha ki katto katne ki constituency ka Party ka khlem pynieng kyrtong shuh namar ka don ka jingsngewthuh jingmut bad ka United Democratic Party (UDP) kiba iatreilang hapoh ka Regional Democratic Alliance (RDA).