Pynbna u Bah Prestone ban shna surok sha Mawkhap-Nongjri Wahskong

U Symbud Myntri Rangbah ka Jylla u Bah Prestone Tynsong hynne ka sngi ula pynhap pyrda noh ia ka jingrakhe ia ka Centenary Jubillee ne ka jingdap 100 snem jong ka Mawkhap Presbyterian LP School kaba hap ha Pynursla Constituency.

Ia kane ka skul la seng ha u snem 1925 katta tang hadien 2 snem ba la wan poi ka AW Thomas ha kane ka shnong da ka jingthmu ban ai jingshai bad jingstad ia ki briew kiba dang sah dum ha kitei ki por, khnang ba kin nangthoh bad pule bad ban pdiang ruh ia ki jinghikai ka Niam Khristan shaphang u Jisu Khrist.

Haba kren ha ka jingialang, u Bah Prestone Tynsong ula ai khublei ia ki bor pyniaid jong ka skul bad ia ki nonghikai kiba la trei shitom haduh ban da kynjoh syndon 100 snem ha ka jingai jingshakri ban ai ia ka jingnang jingstad ia kane ka thain.

“Kum ka dak ban ialehkmen lang ha kane ka jingrakhe dap 100 snem ka skul, nga pynbna ban ai jingiarap T.10 Lak ha u snem ban wan bad nga ieh ruh ha ka jingstad jong ki bor pyniaid jongka skul ba kin pyndonkam ia kane ka pisa ha kano kano ka bynta na ka bynta ban shna ia ka iingskul ne ban shna ia ka madan, ban kyntiew ia ka bha ka miat jong ka skul bad ki khynnah skul” la ong u Bah Prestone uba long ruh u MLA ka Pynursla.

Ha kaba iadei bad ka khia ka shon ki paidbah namar ka jingbym don ia ka surok namar ba ka shnong Mawkhap kadei kaba don ha ka jaka kaba long riat, u Bah Prestone ula pynbna ha ka jingialang ban shna noh ia ka surok ha ka jinglut kaban kot ia ka T.20 Klur bad ka jingshna ia kane ka surok kan long tang kumba 2 Km tam hynrei namar ba ka jinglong jingman ka jaka riat kumta ka jinglut ruh kan bun bha.

U Bah Prestone ula ai khublei ruh ia ki bor pyniaid shnong kiba la kloi ban ai jaka ban shna ia ka surok kaban pyniasoh syndon ruh bad ka shnong Nongjri Wahskong bad ula ong, shisien ba la dep shna ia kane kan pynsuk ia ki paitbah ban leit ban wan bad kan long ruh ka jingkyrkhu ia kane ka thaiñ baroh kawei.

Kham hashwa kane, u Bah Prestone ula iaid da ka kjat ia ki jaka riat kumba 15-20 minit eiei ban poi sha ka shnong Mawkhap ban iashimbynta ha kane ka jingrakhe dap 100 snem ka skul.

Ha kane ka jingrakhe la ioh ruh ia ka jingkren na u MDC barim ka thain u Bah Ryngkatlang Lyndem uba la ai ka jingiaroh ia u Symbud Myntri Rangbah uba dei ruh u MLA ka thain uba la pynbna ban ai jingiarap T.10 Lak ia ka skul bad ban phah shna noh ia ka surok ban poi sha ka shnong ha ka jinglut jingsep kaban kot T.20 Klur.

Nalor kane la ioh ruh ia ka jingkren na u Bah Rahbok Tynsong, ki nongpyniaid jong ka skul, u Rangbah Shnong ha kaba la wan ban iadonlang ki nongialam ka Balang Presbyterian, ki nongialam shnong, ki nonghikai, khynnah skul bad ki nongshong shnong ka Mawkhap bad na ki shnong kiba marjan.

La pynshongkun ia kane ka jingrakhe da ki jingrwai bad ki jingshad kaba la iashimbynta da ki khynnah pule kiba mynta bad ki samla pule kiba rim bad la plie ruh ia u maw sah jingkynmaw jong kane ka jingrakhe ia ka jingdap 100 snem kane ka Mawkhap LP School.