Pynbna u Conrad ïa ka bhah ba T.25 klur ban tei Tourism Center

U Myntri Rangbah ka jylla u Conrad K. Sangma hynne ka sngi ula plie ïa ka ophis treikam jong ka Hima Mawphlang kaba don ha Lumrynkew Mawiong, Mawphlang bad ula pynbna ba la bhah T.25 Klur lyngba ka Swadesh Darshan Scheme ban tei ïa ka Tourism Center bad ïa ki jingtei kiba kongsan ha ki jaka kiba don ha Law Kyntang. U Myntri Rangbah haba kren ha ka jingïalang, ula ong ba ka jingplie ïa kane ka ophis treikam ka long kaei kaei kaban sah jingkynmaw namar ba ka Hima kala im bad kala leh ïa ki kam kiba kyntang mynta la jan ïa ka 1000 snem hynrei kala treikam khlem ka jingdon ïa ka ophis treikam. Ula ong, ba ka Hima Mawphlang kadei ka nongkynti jong u paidbah bad kala ïeng kum ka shap jong ka kolshor, ka riti dustur bad ka jinglong tynrai kaba kyrpang bad ula pynthikna ruh ban bhah tyngka na ka bynta ban tei ïa ki jingdonkam ha katei ka ophis treikam jong ka Hima Mawphlang khnang ba kan lah ban pynjanai bad pynkhlain ïa ka rukom treiakm ka jongka.

U Myntri Rangbah ula iaroh ruh ïa ka shnong Mawphlang ba kum ka jaka jngohkai kaba don ïa ka Law Kyntang bad ka Heritage Village bad ka pynbna ba la bhah T.25 Klur lyngba ka Swadesh Darshan Scheme na ka bynta ka Tourism Center bad ban tei ïa ki jingtei kiba kongsan ha ki jaka kiba don hajan ka Law Kyntang. Nalor kane ula pynbna ruh ba la mang ia ki kam kiba lait ha ka Mawphlang Science & Commercial College bad ki klas kin sa sdang noh naduh mynta u snem bad ula pynbna ruh ban ai T.1 Lak ïa ka Mawphlang Secondary School bad T.1 Lak ïa u bah Pynshailang Lyngdoh bad ka kynhun ka jongu ban ioh thied ïa ki tiar tem.

U Conrad ula kyntu ïa ka Hima Mawphlang ban pynthikna ba ïa ka nongkynti kaba riewspah ka jongki dei ban buh ha ki jingthoh kiba bniah ban pynneh pynsah na ka bynta ki pateng ban dang wan khnang ban ioh ban sam ïa ki jingtip sha ka pyrthei bad ula ong ba yn pyniar ïa ka CM Research Grant na ka bynta ban leh Research ne ban pynlong ïa ka jingwad bniah ha katei ka thaiñ.