Pyndep ka Raij Jowai ïa ka Kbai Mooknor, ka Lehniam banyngkong jong ka Behdieñkhlam

Haka 15/03/2025 u Dolloi ka Elaka Jowai u Puramon Kynjing lem bad u Pator, u Langdoh, ki Sangot, ki Wasan bad ki Phra Kur Phra Kmai kila ia mih hakhmat ka iew ka syiem ban pyndep iaka Kbai Mooknor haka jaka ba don ki Mooknor ha Iawmusiang, Jowai bad kane ka dei ruh ka jinglehniam ba nyngkong duh ban pynkhreh iaka Behdieñkhlam manla u snem shwa ban poi ka lehniam Thoh Langdoh.
Kane ka Kbai Mooknor ka long ruh shi bynta ka jingpynsngew hakhmat ki Blei ki Syiem ba kin theh jingkyrkhu, kumjuh ruh shi bynta ban ai khubor sha ki paidbah ban khang ia kano kano ka hukum ba khanglad daka niam, bad ruh haka jingiadei bad ka niam iap ruh ym shah shuh ban rah shyieng nabar tad haduh ban da lah pyndep iaka jinglehniam. Haba iakren bad u Dolloi ka Elaka Jowai u ong, ka jingwanrah ia kane ka Kbai Mooknor ha Iawmusiang ka don iaka nongrim namar ba dei ka iew niam bala seng daka Ri Khadar Dolloi haki por mynshwa ba lamkhmat daki Dolloi.
Mynshwa ka iew niam ka don ha Nangbah bad daka jingpyrkhat ki Ri Khadar Dolloi la pynkyrpang noh ia kane ka iew niam na Elaka Nangbah sha Elaka Jowai namar ba dei ka iew ba long pdeng.
U ong ruh ba ymtip katno phew snem la sdang ka pyrkhat naka bynta ban shna pynwandur ia kane ka iew, hynrei hapoh ka jingialam ka Seiñraij Jowai u Dolloi bad CEM haki snem ba shadien kila ia buh kyrpang ia kane ka jaka ha Iawmusiang naka bynta ban bit ban biang ki kam niam kam rukom, namar ka niam dei ka jingkyrkhu, ka jingburom jingkheiñkor ia kano kano bala ioh dei ka jingsngewnguh bad haba kheiñkor ne sngewnguh ioh iaka jingkyrkhu.
Kumba hynne ka sngi la pyndep iaka Kbai Mooknor kaba dei ka jingsdang jong ka lehniam Behdeiñkhlam, u iathuh ba haka taiew ban wan yn sa pyndep iaka lehniam Thoh Langdoh, wan saka niam Chad Thoh kaba dei naka bynta ka rep ka riang shwa ban pynhap ia u symbai shaki pynthor, nangta poi biang ka Kbai Mooknor ha kane ka juh ka jaka kaba tip kum ka Kbai Mooknor Kñia khang, hadien kane poi saka Kñia Pyrkhat, nangta ka niam Kñia Aitnar lem bad ki Soo sngi le iaw ka jingpyndep niam Behdeiñkhlam ka ban sa kut haduh u bnai June 2025.