Pynduh ka sorkar ia ka skhim Saubhagya, DDUGJY, yn pynshitom ia ki kontraktor bym pyndep ia ki kam

Ka kynhun Myntri Sorkar hynne ka sngi ka la mynjur ia ka Financial Closure lane ban pynduh noh ai ka skhim Saubhagya bad Deen Dayal Upadhyaya Gram Jyoti Yojana (DDUGJY). Ïa kane ka rai ka Sorkar ka la shim da kaba pynshong nongrim ha ka kaiphod ba la aiti da ka Meghalaya Power Distribution Corporation Limited (MePDCL) ryngkat ka jingbthah ban leh eiei pyrshah ia ki Contractor kiba khlem pyndep ia ka kam ba 54 lak kaba dang sahteng. Kine ki skim ki dei kiba thmu ban pynbiang bording sha ki longiing baduk, hynrei ki slem ban ioh bording namar ki jingsahteng ban ioh ia ki jingtip bad ki jingpynshisha. Haba kren sha ki lad pathai khubor u Myntri Rangbah ka Jylla u Conrad K Sangma ula ong “Ngi la pdiang ia ka kaiphod bad ngi la mynjur ia ka Financial Closure lane ban pynkut noh iaka skhim Saubhagya DDUGJY bad kiwei ki skim”.

U Conrad u la  pyntip ba katba ïa ki kaiphod  jong ka Financial Closure la aiti sha ka Rural Electrification Corporation (REC) bad sha ki tnat Sorkar Pdeng lai snem mynshwa, la bynshet ïa ka MePDCL ban pynlong ïa ka jingpynshisha kaba kham bniah namar ka jingujor halor ki kam kiba dang sah teng ha ki katto katne ki jaka.“Hadien ba la pynshisha bunsien, ka MePDCL ka la lap ba na ka jingtrei kaba T.96 klur tyngka kaba la kdew, T.54 lak tyngka ka kam ki dang sah khlem pat dep” u la ong. “Da kaba pynshong nongrim ïa kata ngi la pdiang ïa ka kaiphod  na ka MePDCL bad la ai jingbit mynta ka sngi ïa ka MePDCL ban ïaid shakhmat bad kane ka kaiphod  kaba mut ba ka jingsiew ia kita ki 54 lak kan ym don bad ia kiwei pat ki kam la dep, la pynshisha bad la pyllait ia ka jingsiew kaba donkam” ula ong.

U Myntri Rangbah u la pynbna ba katkum ka kaiphod jong ka MePDCL, ka kynhun myntri ka la rai ban nym ai jingsiew na ka bynta ka jingtrei kaba khlem pat dep, kaba ktah haduh kumba 30-40 tylli ki shnong. “Ïa ki kontraktor ho’oid yn shim ïa ka kam kumta yn rai ruh ba yn nym siew ïa ki,” u la pynthikna.U Myntri Rangbah ka Jylla ula pynpaw ïa ka jingkyrmen halor ka jingmynjur jong ka Sorkar India ïa ka RDSS (Revamped Distribution Sector Scheme) kaban sa wan, kaba la khmih lynti ba kan myntoi ïa kiba bun ki shnong bad ki longïing. “Ïa ka RDSS la mynjur da ka sorkar India kumta shisien ba la pyntreikam ïa kane ngi don ka jingkyrmen ba ngin lah ban pynmyntoi ïa kiba bun ki nongshong shnong bad ki longïing”.