Pynher lama iong ka NESO ban pyrshah ia ka CAA

Ka Khasi Students Union KSU) hynne ka sngi ka la pyllong ia ka jingwah lama iong bad ki jingwah banner ha kylleng ki jaka jong ka nongbah Shillong kum ka dak ban pyrshah bad ka jingbym lah ban pdiang ia ka Citizenship Amendment Act (CAA) kaba la pyllong ain jubor da ka sorkar India ha u snem 2019. U nongialam ka KSU u bah Lambokstar Marngar haba kren sha ki lad pathai khubor ula ong ba kane ka sngi, kan dei ka jingsah kynmaw ha kylleng ki jaka jong ka thain lammihngi ba ka sorkar India kam shym la sngap ia ki jingpynpaw jong ki kynhun bapher bapher khamtam ka NESO kaba dei ka kynhun kaba hakhmat kaba la shim ia ki sienjam jingiakhih bapher ha kitei ki por.

U bah Lambokstar ula ong ba ka jingbym pdiang ka NESO ia ka jingpyntreikam ia CAB kaba la kylla ain CAA, ka long namar kane ka ain kan plie lad bad kan plie jingkhang ia ki poiwir ha kine ki thain lammihngi. Ula ong ba da ki phew snem ki la sakhi, ym tang ha kane ka jylla hynrei sha baroh ki jaka jong ka thain lammihngi, ki pynsngew ia kajuh ka jingeh halor ka jingwan rung kyrtlep ki briew nabar ka jylla. Ha kajuh ka por, ula ong ba wat ka jylla Nagaland kaba don ia ka Inner Line Permit (ILP) ruh ka don ka jingshong syier, katno tam ka jylla Meghalaya ka bym don ia kino kino ki ain ban iada, kan shong syier na ka jingwan rung kyrtlep ki briew nabar.

Katkum ka jingong u President ka KSU, ki paidbah ka jylla ki la dawa ia ka ILP la slem hynrei haduh mynta la hynriew snem ym shym la iohi dak eiei ba ka sorkar pdeng kan leh halor ka jing dawa jong ki. Ula ong ba wat la ki la iakynduh ia ki Myntri ka sorkar pdeng ruh, hynrei kim shym la ioh jingpynshai eiei halor ka ILP. “Ka jingbym ai ia ka ILP ka lah ban dei na ka jingbym shimkhia ka sorkar jylla ne ka jingbym mon ka sorkar pdeng ban ai ia ka ILP,” ula ong.