Pyniasoh palat 500 ngut ki nongialam VPP bad Congress sha ka NPP

Ka National Peoples Party (NPP) Nartiang Block Committee hynne ka sngi, ka la pdiang burom palat 500 ngut ki nongialam bad ki nongkyrshan na ka seng Voice of the People’s Party (VPP) bad Congress kiba la wan ban pyniasoh sha ka NPP ha ka jingialang kaba la long ha Community Hall Wahiajer kaba hap ha Nartiang ConstituencyKi nongialam ka NPP ki la pyntip ba kine ki nongialam bad ki nongkyrshan kiba don palat ia ka 500 ngut na ka seng VPP, Congress bad na kiwei kiwei ki seng, kidei kiba na ki 73 tylli ki shnong kiba hap ha ka Nartiang Constituency ban kyrshan noh ia u MLA ka thain u Bah Sniawbhalang Dhar bad ban pynkhlain ruh ia ka seng NPP ha ka rilum Jaintia bad ha ka jylla baroh kawei. La pdiang sngewbha ia kitei ki nongialam bad nongkyrshan kiba la wan rung mynta sha ka seng NPP, da u Working President ka NPP Meghalaya u Bah Sniawbhalang Dhar ha ryngkat ka jingdonlang u CEM ka KHADC u Bah Thombor Shiwat, u MDC ka Wahiajer u Bah Reformingson Lamare, u MDC ka Mynsngat Khanduli u Bah Phein Nianglein, u MDC ka Moodymmai u Bah Jesse Suiam, ki MDC ka Moodymmai bad ki nongkyrshan ka NPP.

U Bah Knierlang Siangshai uba la mih noh na ka seng VPP, haba kren ha ka jingialang, ula ong ba ula don bad kyrshan ia ka seng VPP kaba ieng bad ieid ia ka ri bad jaidbynriew hynrei kaba sngewsih pat ban iohi, kadei ba ka seng VPP mar ia jop ia ka elekshon MDC bad bat ia u lakam synshar ha KHADC kam shim la don ia ka jingsngew na ka bynta ka jaidbynriew hynrei kala beh kam pynban ia ki paradoh parasnam.Ula ong, “Kine ki nongtrei ha KHADC kidei na ka jaidbynriew jong ngi bad nga dap da ka jingsngewsih bad kumta nga lah rai ban mih noh na ka seng VPP ban iasoh noh bad ka NPP ban iatreilang ban kyntiew ia ka Constituency bad ia ka rilum Jaintia”.Katba uwei pat u nongialam ka seng Congress ula ong, ba ka daw kaba la pynlong ia u bad ia kiwei pat ki nongkitkam ka seng Congress ban mih bad ban pyniasoh noh bad ka NPP kadei hadien ka jingsakhi ka jongki ba ka NPP kaba ialam ai ka sorkar kala theh ia ki kam pynroi bad kala shimkhia ia ka jingeh jongki paidbah bad kyntiew ia ka bha ka miat ha ka jylla Meghalaya baroh kawei.

Nalor kane ula ong, ba ka dawbah kaba la pynlong ia ki ban pyniasoh sha ka NPP ka dei haba ki la sakhi ia ka jingtrei shitom jong u MLA ka Nartiang u Bah Sniawbhalang Dhar uba la wanrah ia ki kam pynroi kiba bun ban kyntiew ia ka Constituency bad u dei ruh u briew uba kloi ban iarap ia ki paitbah haba ki mad ia kino kino ki jingeh ha ka jinghim ka jong ki.U Bah Sniawbhalang ula ai khublei ia kine nongialam bad nongkyrshan na ka seng VPP bad Congress kiba la wan ban pyniasoh noh ia lade bad ka NPP bad ula kular ba un trei shitom ban pynkhlain ia ka seng ha ka rilum Jaintia bad ha ka jylla baroh kawei. U la kyntu ruh ia baroh ba nangne shakhmat kin iaid thymmai bad ban iatreilang ban kyntiew ia ka bha ka miat bad ia ka roi ka par bad ula ong, ba kum u MLA um long u briew uba biang lut nadong shadong bad ula pan map na baroh kiba don ha ka jingialang lada u don ia kano kano ka jingbakla ne jingduna.