Pyniasoh UDP da ki spah ki nongkyrshan na kwei ki seng ha Mawkyrwat

Ka United Democratic Party (UDP) Mawkyrwat Circle mynta ka sngi ka la pynlong ia ka jingialang jong ki nongkitkam ka party ha ophis jong ka ha Mawkyrwat ha kaba da ki spah ngut ki nongialam bad ki nongkyrshan na ki party bapher bapher ki la wan ban pyniasoh ialade bad ka UDP. U Working President ka UDP Seng Kmie uba dei ruh u CEM barim ka KHADC, u Bah Titos Chyne u la pdiang sngewbha ia ki nongwan thymmai kiba kynthup ia ki nongialam bad ki nongkyrshan jong ka HSPDP, Congress, NPP bad Trinamool Congress sha ka UDP. U bah Titos u la pynithuh paitbah ruh ia u Jeslanroy Nongsiej, u kyrtong ka party ha kane ka elekshon MDC na Mawkyrwat Konstitwensi ha ka jingiadonlang u MLA ka Mawkyrwat, Bah Renikton L. Tongkhar lem bad kiwei kiwei ki nongialam ka UDP Mawkyrwat Circle.

Haba kren ha kane ka sngi, u bah Chyne u la kyntu ia ki nongwan pyniasoh thymmai ba kin iatreilang bad ki primary unit ha la kijong kijong ki shnong khnang ba kin lah ban pynkhlain ia ka party bad ban pynthikna ba ka party kan jop ha kane ka elekshon MDC ban wan. U bah Titos u la kyntu ruh ia u bah Jes ba lada u jop ia ka elekshon u dei ban long u nongmihkhmat paidbah uba don ia ki nongrim kiba skhem ban iaineh bad la kajong ka party, bad ym dei ban ban shu kylla rong na kawei ka party sha kawei pat namar ia kane ka kam ki paitbah kin shim beit ba kadei ka jingshet kylla ia ki nongkyrshan bad ia u MLA uba kyrshan borbah ia u.“Nga sngewkmen shibun ban iathuh ia baroh ba ha kane ka samoi treikam ba mynta baroh ki MDC ka UDP ki khlem kynthih diengkper. Kham mynshwa baroh phi ia tip ba ki MDC ki kylla rong man ka por, bad kumta phi dei ban burom ia baroh kiba kyrshan ia phi”, la ong u Titos.

Watla ki khubor khlieng tyngap ki la saphriang stet ba ka UDP ha Mawkyrwat Constituency ka iapait da kaba kam ba kito ki rangbah ki bym ioh tiket ki la phet bad pyniasoh sha kiwei pat ki party, hynrei mynta ka sngi ki arngut ki nongialam ka UDP Mawkyrwat Circle ki bym shym la ioh tiket ban iakhun ia ka ilekshon MDC, kata, u Bah Edilbert Iawphniaw bad u Bah Synshar Lyngkhoi ki pynshai paidbah ia la kijong ki nongrim ba ki dang neh skhem hapoh ka UDP bad kin iai trei shitom na ka bynta ban pynjop ia u kyrtong ka seng, u bah Jeslanroy Nongsiej.