Pynieng ka Seng Khasi 40 ki Mawbynna ha Lum Sohpetbneng

U Lat ka jylla u C.H Vijayashankar, u da nguh da dem khurup hakhmat u Mawbynna ba pynieng da ka Seng Khasi Kmie,  Mawkhar Shillong, hajan ka duwan ka dupat u Lum Sohpetbneng, ha ka sngi kaba u la leit ban iashim bynta ha ka jingpynieng ia kumba 40 tylli tam ki mawbynna sah nam sah kyrteng jong ki Jylli bad ki Tnat Seng Khasi bad Seiñ Raij, kaba la long mynta ka sngi halor une u lum ba kyntang. Nalor u Lat, kiba la poi ban sakhi lang ia kane ka sngi ka kynthup naduh u Symbud Myntri Rangbah ka jylla ba dei khmih ia ka tnat Home (Police) bah Prestone Tynsong, u myntri ba dei khmih ia ka tnat Arts & Culture u bah Sanbor Shullai, Bah Lahkmen Rymbui, myntri ba dei khmih ia ka tnat pule puthi.

Kumban shu pynkynmaw ba mynta ka sngi, kane ka jingpynieng ia kine ki 40 tylli tam ki mawbynna, ka dei artad kum shi bynta ba kum ka seng ka rakhe ia ka lyngkhuh snem kaba 125 ka jingseng ia ka Seng Khasi. Sa kiwei kiwei pat ki riew pawkhmat ki kiba la wan ban ia sakhi lang ia kane ka sngi ban pynahnam tam ia ka jaidbynriew ki long u Syiem ka Hima Mylliem u Pa’iem Ainam  Manik Syiem, u Dalloi  ka Jowai  Puramon Kynjing, Doloi  Nangbah  Moon Garod, ha kaba la don lang u President, General Secretary ka Seng Khasi Kmie, Rgh O. Pyngroe, Rgh Hainess Marbaniang, ki dkhot ka Jylli Pyrkhat Kam (JPK) Seng Khasi, ki nongialam ba hakhmat ki jylli bad ki  tnat.

Ka jingpynieng ia kine ki mawbynna sah nam ha kliar bad ki sawdong sawkun jong une u lum ba kyntang, kan pynkylla shi syndon ia ka dur ka dar jong u, uba mynta nangne shakhmat kan da don ka ‘Kper Mawbynna’, ka dak jong katta ka jinglong ba ia tylli kum ka jaitbynriew, kaba dang don dang sah haduh mynta ia laka jong ka niam hok tynrai ka jong ka. Haba kren ha ka jingialang, u Lat um lah ban khlem da pyrto bad ai nam ai burom ia ka Seng Khasi, kiba la trei shitom bad ban aiti met bad mynsiem naka bynta ban pynneh ban pynsah ia ka riti ka dustur, ia ka snap ka jingstad u longshwa u manshwa, kaba iai bteng ba kan hiar pateng la pateng tad haduh kine ki sngi kiba mynta.