Pynithuh ka VPP ïa ki 5 ngut ki kyrtong MDC na Ri Bhoi District

Ki nongialam ka seng sainhima jong ka Voice of the People’s Party (VPP) mynta ka sngi ki la hiar sha Umsning ban pynithuh paidbah ia ki 5 ngut ki kyrtong jong ka party kiban aireng ha kane ka ileksion MDC kaban sa long shen hapoh ka jylla Meghalaya bad ruh ban pynshai ia ki paidbah halor ki nongrim ba ki don bad ka jingdonkam sa shisien ia ka jingkyrshan kaba radbah jong ki ban pynjop ia kine ki kyrtong. Ha kane ka sngi, ka VPP ka la pynpaw paidbah ia ki 5 ngut ki kyrtong kiban aireng kiba kynthup ia u Bah Isynei Hinge na Umroi Konstituensi, u Bah Mathew Kenneth Makdoh na Nongpoh Konstituensi, u Bah Apkyrmen Lyngdoh na Jirang Konstituensi, u Bah Banrikus Nongsteng na Umsning Constituency, Bah Kynjohlang Rangtong na Mawhati Constituency, ha kaba ia ka kyrteng jong kine ki kyrtong la pynbna da u Dr. Kara H Chen Chairman ka State Election Committee ka VPP.

La wan ban ai mynsiem bad ban sakhilang ha kane ka sngi da u Dr. Ricky AJ Syngkon, MP ka Shillong Parliamentary Seat, u Bah Brightstarwell Marbaniang, MLA ka Mawlai bad kiwei kiwei ki nongialam ka VPP. Haba kren paidbah, ki nongialam ka VPP ki la pharia ba ka nongrim ba hakhmat eh jong ka party kaba ieng ha ka shap jong u Prah ka long ban wanrah ia ka synshar ka khaddar kaba khuid kaba suba bad kaba kylla ha kane ka jylla Meghalaya namar haduh mynta kam pat don jingkylla satia hynrei ka la nang hiar arsut na kaba sniew sha kaba sniew bad kum ka party ka angnud ba kane nongrim kin urlong dei tang lada u paidbah un pynkup bor da ka jingkyrshan bad ban pynjop ha kane ka ileksion MDC kaban sa long shen ha ka jylla ban tei pat ia ka ri bad ka jaidbynriew.

Ki la pynpaw ruh, ba ki kyrtong kiba ka party hi ka la sei ban aireng ha kane ka ileksion sha ka Iingdorbar thaw ain jong ka KHADC bad JHADC ki dei kiba la jied kyrpang bad kiba don shisha ia kata ka thong ban shakri ia u paidbah ban wanrah ia ki jingkylla lada ki poi sha ka thong, kumta ka VPP sa shisien ka hiar sha u paidbah ban pan ia ka jingkyrshan kumba ki paidbah ki la dep ban pynjop don burom ia ka party VPP ha ka ileksion MP kaba la dep.