Pynjari kyndon 163 BNSS ka DC ban mana die dohkha Bangla

Ka District Magistrate, East Khasi Hills District ka la pynjari kyndon 163 BNSS ban khang ia ki nongkhaii ba die beain ia ki dohkha na Bangladesh.

Katkum ka hukum ka la maham ban khaii ia ki dohkha ba shalan tuh na Bangladesh ki kot kiba biang ban pynthikna ia ka koit ka khiah. Kane ka long hadien ba ioh khubor ba ka don ka jingkhaii be-aiñ ia ki dohkha na ri Bangladesh ha ki khappud, ki surok bad ki jaka ha ka Jylla.

Ka hukum kala kdew ruh, ba kane ka khaii be-aiñ bad ka jingpynrung tuh ia ki dohkha kadei ka jingpynkhein ia ki kyndon aiñ jongka Custom, ka jingkhaii pateng bad kiwei ki kyndon pyrkhing jongka Food Safety kaba kynthup ia ka jingma ban pynpoi ia ki jait jingthaw kiba pang ne kiba sniew.

Ka hukum kala ong, ba kum kane ka jingleh be-aiñ. Ka bym khmih bniah bad ka jingdie kaba khlem da pynshisha ia kine ki dohkha kiba wan nabar ri ka buh ha ka jingma kaba khraw ia ka koit ka khiah jong ki paitbah bad ia ka khuid ka suba, kan ktah ruh ia ka jingshngain sawdong sawkun jong ki dohum dohwah kiba don ha ka jylla bad ka wanrah ïa ka jingduhnong ha ka ioh ka kot ïa ki nongkhaii dohkha kiba dei hok bad ia ka sorkar jylla.

Kane ka hukum kan treikam noh mardor tad haduh da pynmih da kawei pat ka hukum bad kino kino kiba pynkhein ia kane ka hukum kin shah pynshitom tyngeh katkum ka kyndon 223 jong ka BNS bad kiwei ki kyndon aiñ kiba kynthup ia ka Custom Act, Foreigners Act, Passport Act bad kiwei kiwei.