Pynjari kyndon 163 ki bor pynïaid District ka EJH, ym shah ban ïalum palat 5 ngut

Hadien ba kala don ka jingiap jong ki 27 ngut ki briew na ka jingbthei kaba la jia ha ka par tih dewiong be-aiñ ha ka shnong Thangsko, ki bor pyniaid district jong ka East Jaintia Hills District kala pynjari ia ka kyndon 163 jong ka Bharatiya Nagarik Suraksha Sanhita (BNSS) bad la mana tyngeh ban ialum briew palat ia ka 5 ngut hajan katei ka jaka tih dewiong be-aiñ. U District Magistrate u Manish Kumar ula pynmih ia kane ka hukum ha ka sngi saitjain, ba kane ka jingleh kadei da kaba bud ia ka hukum kaba la pynmih da ka Meghalaya High Court ha ka 5 tarik u Rymphang, kaba la shim ia ka ‘Judicial Notice’ jong ka jingbthei ha ki 3 tylli ki par tih dewiong be-aiñ bad la bthah ia ki bor kiba dei khmih ba kin sdang mardor bad ban leh da kaba tyngeh pyrshah ia kito kiba donkti ha katei ka kam tih be-aiñ.

Da kaba pynshong nong-rim na ki jingujor kiba biang na ki nongshong shnong bad ki kaiphod kiba la mih ha ki rynsan Social Media halor ka jingbteng jong ka jingtih dewiong be-aiñ ha ka thain Thangsko, u District Magistrate ula pynpaw ba ka lah ban don ka jingbitar ha ka jingpyntreikam ia ki jingkhynra kynthup ia ka jingpynduh pyndam noh ia ki jaka riehtngen kiba shipor, ka jingkhang dam ia ki jaka tih bad ka jingkurup ia ki tiar ki tar bad ia ki kor ki bor. Ha ka hukum la mana tyngeh ba kino kino ki jingialum kaba palat ia ka 5 ngut ha kino kino ki bynta jong ki jaka tih dewiong be-aiñ kadei kaba la mana pyrshah bad kaban treikam noh mardor, lait noh tang ia ki ophisar sorkar kiba pyndep ia ki kamram ba shongain ki jongki.

Ia kane ka hukum la pynmih namar ka jingdonkam kyrkieh ka kam bad kan iai bteng ban treikam tad haduh ban da pynmih da kawei pat ka hukum bad la maham ba kano kano ka jingpynkhein kan khring ban shah pynshitom tyngeh ha ki kyndon jong ki aiñ bapher bapher. La bthah ia ki majistor bad ia ki pulit ban pynlong ia ka jingjurip kaba bniah bad ba pyrkhing bha ha kylleng jong ka Thangsko, ban kurup ia ki kali, ki mashin bad ia ki tiar ki tar kiba la pyndonkam ha ka kam tih be-ain bad ban shim ia ki sienjam da kaba iaid hapoh jong ka Mines and Minerals (Development and Regulation) Act bad kiwei kiwei ki kyndon ain, ban ithuh, bat bad kem ia ki trai par, ki nongpyniaid, ki nongbei tyngka bad kiwei kiwei kiba donkti bad ban lum ia kiei kiei kiba don ka jingiasoh lang bad kitei ki kam.