Ka ophis jong ka Commissioner for person with disability ryngkat ka jingiatreilang bad ka State Resource Center on Disabilities Affairs hynne ka sngi ka la pynkup burom ia 8 ngut ki briew kiba don jingduna ha ki dkhot met kiba la lah ban seng kam lajong lyngba ka jingiarap ka sorkar jylla na ka Prime. Ha kane ka sngi la pyllait paidbah ruh ia ka Sugamya Yatra ban iarap ia ki briew kiba duna dkhot met, haba ki leit sha kylleng ki jaka da kaba ki don ia ka App ‘Yes to Access’.
Ka jingthmu jong kane ka App ka long na bynta ban weng ia ka jingeh bad ban pynsuk ia ki briew kiba don jingduna ha ki dkhot met haba ki leit sha kino kino ki jaka paidbah. Ha kane ka sngi na ka liang u myntri jong ka sorkar jylla u Bah Paul Lyndoh u la long kum u kongsan ha rynkat ka jingdonlang ka Director jong ka Social welfare ka kong Camelia Doreen Lyngwa kaba la long kum ka symbud kongsan.
Haba kren ha kane ka sngi u bah Paul Lyngdoh ula ong ba u kwah ban long Myntri ym tang ka kyrteng hynrei u kwah ban peit ban shakri ia ka jingdonkam jong ki briew kiba donkam shisha ia ka jingiarap. Ula ong ba ka sorkar ka lah ban poi sha ka thong tang lada baroh ki ai ka jingiatreilang bad ki donlang ia ka jingkitkhlieh. Ula pynpaw ia ka jingsngewkmen ba ka sorkar jylla ka la lah ban pynbor ia ka sorkar India lyngba ka tnad Social Justice & Empowerment, ban thaw ia ka Sports Centre ha Mawkhanu, New Shillong.