Pynkup burom ka Khadsawphra Kolej ia 495 ngut ki samla ba pass Hons B.A bad B.Com

Ka Khadsawphra College, Mairang ha ka 25 tarik mynta u bnai ka la pynkup burom ia ki Samla pule kiba la pyndep ia ka B.A bad B.Com (Hons) naduh ka snem 2022-2025. Ki Samla ba la pass ia ka B.A ki long 425 ngut bad ha ka kyrdan B.Com ki long 70 ngut. U Kongsan ha katei ka sngi u long u Vijay Kumar Mantri, IAS uba dei u Commissioner and Secretary ka Sorkar Meghalaya. Ka Prof. Ibadani Syiem, Controller of Examinations, NEHU, u Bah Macdonald Marbaniang, Director MBOSE bad Bah M. Diengdoh MCS, ADC ka District Eastern West kum ki Symbud Kongsan.

Ki Kongsan ki la ai ka jingiaroh ia ka College kaba la kiewsted ha baroh ki liang wat la kam pat la ioh kano kano ka jingiarap na ka sorkar bad ki khmih lynti ba ka College kan nanglah ban ai ka jingshakri kaba kham bha shuh ha ki snem ki ban wan. Ki Kongsan ki la pynpaw ka jingkmen ban tip na u Babu Boldness, Principal ia ka development bad performance jong ka college ha kine ki khyndiat snem ha kaba ha u snem 2017 mynba la sdang ban seng ia ka, ki la don tang 57 ngut ki samla pule katba mynta ki la don haduh 642 ngut bad ka Result ha kine ki snem ka long beit shispah na ka shispah ha baroh ki Hons Subject, lait noh tang mynta u snem 2025 kaba ka Result ka long 98.5% ia kaba ki don ki khynnah kiba hap ban pyndep ia ki subject kiba ki fail ha kiwei ki semester. Ki la ong ba “Ka Khadsawphra College ka dei kawei na ki private unaided College babha tam ia kaba ngi lah ban sakhi na kane ka 2nd Graduation Celebration mynta ka sngi.”

Ha kane ka sngi la ioh ban sam ia ka Kitdor Memorial Award ba la ju ai sha ki Topper jong ka College bad ia ki Mtab sha ki class XII. Ha kane ka sngi la sam ruh ia ki Syrnod sha baroh ki Samla ba la pyndep ia ki degree jongki da ki Kongsan. Bad la pynphuh pynphieng ia kane ka sngi da ka jingrwai Anthem bad jingrwai Lariti da ki samla pule kane ka College.