Pynkup burom ka Kur Sookpoh Khadar Wyrnai ïa ki khun ba wan shakhmat ha ki jingpule

Ka Kur Sookpoh Khadar Wyrnai, Jowai kaba kynthup ia bun ki jait Kur haka, haka 14/12/24 kala pynlong ka jingiakynduh lang ba shisien shisnem ki khun ka Kur kumba juh leh manla u snem, bad ia kane  ka jingiakynduh lang la pynlong ha ïing Kur Sookpoh Khadar Wyrnai hi kaba don ha Chiliangraij Jowai.  Na ka liang ka Kur ha kane ka sngi kala pynkup burom iaki khun ka Kur kiba poi shakhmat haki kyrdan pule bapher bapher ba kynthup naduh kiba ioh iaka nam Doctor, kiba pass bha haki kyrdan Master, Degree, HSSLC bad SSLC kum shi bynta ban pynshlur chuh chuh iaki khun ka Kur ba kin  nangkiew nangroi haka pule puthi.

Ka Kur Sookpoh Khadar Wyrnai kala pynkup burom ruh iaki President bad Secretary jong ki tnat bapher bapher, kumjuh ruh ia kiba la palat 75 snem ka rta kum ka dak ban burom da ka pateng ba mynta ia kaei ba kila ioh  lyngba ka jinglam lynti jong ki kiba la heh rta. Nangta hadien ba ioh jingkren na u Dr.Tyrchaiñ Mitre Lipon, la ioh ruh ka  jingkren naka Dr.Mebalarisha H. Paswet kum kawei ba shah pynkup burom. U President ka kur, u Puramon Kynjing uba dei ruh u Dolloi ka Elaka Jowai haba kren u iathuh iaka khana jong ka Kur, bad  ong ruh ba iaka shnong Jowai la seng daka Kur Sookpoh lyngba ki 4 ngut shipara ka Bon, ka Teiñ, ka Wet bad ka Doh. U ong ruh ka Kur Sookpoh dei kaba sbun kaba bha mynsiem, bad naka jingbha mynsiem ban ai jaka sah ia kiwei ki jait Kur, kumba long mynta  ki khun ka Kur bun kiba shu sah ïingwai ha Jowai.

Nangta u kyntu ruh iaki khun ka Kur ba kin long tipbriew tipblei, ba kin ri syndong iaka jinglong shi kur ha kano kano ka jaka, bad ban iatreilang naka bynta ka jingbha, da kaba khmih lynti ruh ba ka jingnang jingstad hapoh ka Kur kan  nangkiew shuh shuh shakhmat. Shwa kane la ioh ruh ki kyntien lamkhmat na u Shape Paswet, Vice President ka Kur, la ioh ka Report treikam ka kur na u General Secretary u Marryngkat Syngkon, ka jingkren  na u Womlin Pakynteiñ Executive Member ka Kur, ka jingnguh Blei na u Valentidio Paswet Asst General Secretary.