Pynkup burom ka Kur Warjri ïa ka Rifiness, Dr. Calvin bad Kynsailang

Ka Dorbar Kur Warjri ba 27 la pynlong ha shnong Siejiong ha kaba da ki hajar ki kur Warjri ki la iashim bynta ha ka jingialang kur. Ha ka dorbar kur la ioh ki jingkren na ka bynta ban tei bad iada ia ka kur Warjri na kino kino ki jingkylla kiba long pyrshah ia ka riti dustur tynrai. Ha kane ka jingialang la pynkup burom ia ki parakur kiba la tyngshaiñ ha la ki kam pule dangle bad kiwei kiwei ki jingtbit kyrpang kynthup

ia ka samla Rifiness Warjri kaba la jop ha ka jingkiew Lum Everest ha syntai lum Makashang, u Dr. Calvin Donkupar Warjri ba la jop ia ka kyrdan PhD ha ka Zoology; Kynsailang Warjri ba la jop kyrdan ba hynriew na ki ba poi shakhmat ha ka BSc Microbiology, Rokesh Warjri, ba la ioh pdiang ia ka takma na ka kam Fire Service, bad ka Rufina Warjri, ba la jop kyrdan baphra napdeng ki ba wan shakhmat ha ka B.Com degree.

Nalor kata ka la don ruh ka jingialehkai phutbol ha kaba ka shnat Thynroit ka la jop shidor thong pyrshah ia ka shnat Eastern West Khasi Hills bad la sam ia ki khurinam bad ki takma ia baroh arliang ki nongjop lahduh bad ka kynhun ba bud. Nalor kata la don ruh ki jingrwai bad jingshad tynrai ba la pynkhreh da ki khynnah samla bad rangbah na ka shnat Siejiong kynthup ruh ka jingrwai na shnat Mawkneng bad Nongspung kiba la pynshongshit shi katdei ia ka Dorbar Kur Warjri.