Pynkup burom ka MBYCC ia ka samla Banrihun ba khur ar ki takma ksiar

Ka Mawkyrwat Block Youth Congress Committee (MBYCC) ha ka Sngi Thohdieng ka la pynkup burom ia ka samla Banrihun Lyngdoh Marshilong, kaba dei ka samla na ka shnong Marshillong, 4 KM eiei na Mawkyrwat ha South West Khasi Hills District kaba la khur ar tylli ki takma ksiar ha ka lympung ialehkai National Arm-Wrestling Championship, 2025 kaba la long ha Kerala mynta u bnai.Haba kren ha kane ka sngi, u Kynpham V Kharlyngdoh, President ka South West Khasi Hills District Congress Committee (SWKHDCC) u la ong, “Kum ka seng ngi sngew sarong shibun ia phi bad ngi kwah ban ai mynsiem ia phi ba phin ym sahkut tang hangne, hynrei ban iaid shaphrang bad ban iai trei shitom khnang ba phin lah ban wanrah shuh shuh ka nam bad ka burom ia ka iing ka sem, ka shnong ka thaw, ka district bad ka Jylla baroh kawei bad lehse ha kawei ka sngi ngin sa sakhi ïa phi ba phin poi sha kawei pat ka kyrdan ha ka pyrthei bad wanrah nam ïa ka ri baroh kawei”.

U Bah Kynpham u la pynpaw ruh ïa ka jingkmen ban ïohi ba ki samla napoh ka District ki la tyngshaiñ ha ka National Level ha ki jingïalehkai bapher bapher uwei hadien uwei pat. U la ong, ka Mawkyrwat ka dei kawei na ki thaiñ kaba la pynmih shibun ki riew ïalehkai kiba la kynsai, kiba la tyngshain ha ki kyrdan bapher bapher hapoh ka jylla, ka ri bad ka pyrthei baroh kawei bad u la pynpaw ruh ia ka jingkyrmen ba ka district kan nang pynmih shuh shuh ïa ki samla ha ki jait jingïalehkai bapher bapher.Haba kren sha ki lad pathai khubor, ka samla Banrihun Lyngdoh Marshilong ka la ong ba ka jingjop jong ka ha kane ka jingiakop ka dei namar ka jingai mynsiem na kiba ha iing ha sem, ki para shnong, ki para nongialehkai bad ki paitbah ka District kiba la kyrshan lem ia ka da ka pisa ha kaba ka la ioh ban iashimbynta ha kane ka jingiakop.

“Nyngkong eh nga ainguh ïa u Blei uba la sumar ïa nga ha ki por baroh bad uba la ai ruh ïa nga ka met kaba koit ba khiah ha kaba nga la poi sha kane ka thong. Nga ai khublei ruh ïa baroh kito kiba la kyrshan lem bad ai mynsiem ïa nga lyngba ki jingduwai,” ong ka samla Banrihun, kaba la ai khublei kyrpang ïa u bah Aldous Wanniang uba dei u president jong ka seng jong ka Arm Wrestling ha South West Khasi Hills district.