Pynkup burom ka ophis PHE ia 3 ngut ba ioh ‘Award’ Jal Mahotsav

Ka ophis jong u Executive Engineer, PHE, Mawkyrwat Division mynta ka sngi ka la pynkup burom ia ki lai ngut ki riewshimet na South West Khasi Hills kiba la wanrah burom ia ka District hadien ba ki la ioh ia ka ‘national award’ ha ka jingrakhe ia ka Jal Mahotsav, 2026 ha Nongbah New Delhi dang shen halor ka jingnoh synniang jong ki sha ka jingpynbiang ia ka umbam umdih ha ki shnong nongkyndong.

Ïa kane ka prokram la pynlong ha ka hall jong ka ophis u EE PHE, Mawkyrwat ha kaba ka tnat ka la ioh ban pynkut ruh ïa ka jingrakhe ba ar taiew ïa ka Jal Mohotsav kaba la sdang naduh ka 8 tarik u Lber 2026 bad ha kajuh ka por ka la rakhe ruh ïa ka World Water Day ha kaba la wan iashimbynta da ki dkhot jong ki Village Water Sanitation Committee (VWSC) na kylleng ki shnong hapoh ka Mawkyrwat bad Ranikor Block.

Kine kiba la shah pynkup burom ki kynthup ia ka kong Elitamarry Lyngdoh na ka Shnong Jashiar kaba la ioh ia ka kyrdan ba nyngkong ha ka liang ki Kynthei ha ka jingtbit ban test ia ka um lyngba ka FTK ban pynthikna ba ka umbam umdih ka long kaba khuid ha shnong ha thaw, u Bah Spiland Jyrwa, Myntri ka shnong Pyndendiwah uba la ïoh ïa ka kyrdan ba nyngkong kum Myntri uba tbit bad shim khia kumno ban pyniaid beit pynïaid ryntih ia ka skhim JJM hapoh shnong bad u Bah Archemedes Nongrem, Myntri ka shnong Nongdewsaw uba la la ïoh ia ka kyrdan ba ar kum ka shnong kaba ioh ia ka umbam umdih baroh 24 kynta.

Nalor kane, ka ophis jong u EE PHE Mawkyrwat Division ka la pynkup burom ruh ïa ki hynniew tylli ki shnong na ka District kiba la ioh ia ka jingithuh kum ka ‘Har Ghar Jal Village’ bad la aiti ruh ha ki ïa ka skhim JJM ban pynïaid.

Haba kren ha ka jingialang, u EE ka PHE Mawkyrwat Division, u Bah K. Nongbsaw u la ai khublei ïa kine ki lai ngut kiba la ïoh ïa kane ka khusnam halor ka kam ba ratbah jong ki kaba la wanrah burom ïa ka District hi baroh kawei. U Bah Nongbsaw u la ong ruh ba kane ka long ka jingsarong ïa ki paitbah jong ka District hi baroh kawei namar ba ki don 10 tylli ki shnong na baroh kawei ka Jylla Meghalaya kiba la ïoh pdiang khusnam ha katei ka Jal Mahotsav ha New Delhi bad lai tylli kidei na South West Khasi Hills.

U bah Nongbsaw u la kyntu ruh ia ki dkhot jong ki VWSC na ki shnong bapher bapher hapoh ka District ban iada ia ki tyllong um kiba ngi ioh lyngba ki wah bad ki wahduid namar ba khlem ka um ngin ym lah ban im. “Phi ïohi ïa ka jingdon jong ki pipe um, ki top um, jaka pynlang um ha ki shnong jong phi, hynrei kine baroh kin long lehnohei lada ym don um ne lada jia ba ki tyllong um ki rngah noh. Namarkata, ha kane ka sngi ba ngi rakhe ruh ïa ka World Water Day, to ngin shim ia ka jingkitkhlieh ban iada ia ki tyllong um,” ong u Bah Nongbsaw.