Pynkup burom ka President ia u Kisen Wanniang da ka khusnam riew shlur

Ka President ka Ri India, ka Droupadi Murmu ka la pynkup burom ia 17 ngut ki khynnah ha ka 26 tarik Nohprah ha ki hynriew tylli ki kyrdan ha ka jingialang ha Rashtrapati Bhavan Cultural Centre, New Delhi. U Kisen Wanniang na jylla Meghalaya ula ioh ia kane ka khusnam namar ka jingshlur jong u bad ka long ka jingkmen ia ka jylla baroh kawei. U samla Kisen Wanniang ba dang 15 snem ka rta na ka shnong Mawlangwir, South West Khasi Hills ula pyni ïa ka jingshlur da kaba u la lah ban pyllait im ïa ki saw ngut ki khynnah ba dang 9 haduh 12 snem ka rta na ka wah Maweitksar ha ka por ba jur u slap. U dei u khun jong ka kmie ba trei marwei kum ka nongbylla iing, ha katei ka por u Kisen u dang saitjain harud wah haba u ioh sngew ia ka jingpyrta ki khynnah ban iarap.

Khlem pynslem ne pyrkhat ia la ka jong ka jingim u la ngam shapoh wah bad da ka jingshlur ula lah ban pyllait im uwei hadien ia kitei ki khynnah saw ngut. U Kisen Wanniang u la shah pynkup burom da ka khusnam Pradhan Mantri Rashtriya Bal Puraskar namar ka jingshlur jong u kaba long ka nuksa ia kiwei pat. Haba kren ha kane ka sngi, ka President ka la ai khublei ia baroh ki nongjop khusnam bad ka la ong, ba ka ri baroh kawei bad ka imlang sahlang ka sngew sarong ia ki. Ka la iathuh ki khynnah ki la leh ia ki kam ba phylla bad ki ioh ia ki jingjop ba phylla.

Ka President ka la ong, ka jingai lad bad ka jingithuh ia ki sap jong ki khynnah ka long shibynta jong ka dustur jong ngi. Ka la ban jur ba dei ban pynkhlain shuh shuh ia kane ka dustur. Ka la ong ha u snem 2047 ha kaba ngin rakhe ia ka jingdap shispah snem ka jinglaitluid ka ri India, kine ki nongioh khusnam kin long ki nongshong shnong ba shai jong ka ri. Kum kine ki khynnah shynrang bad kynthei kiba don sap kin long ki nongtei ia ka ri India bad ka roi ka par.