Pynkup burom ka Sacred Heart Girls HSS bad bah PT Sawkmie ïa kiba ïoh Top 20

Ka Sacred Heart Girls Higher Secondary School kaba don ha Mawlai ryngkat bad u bah PT Sawkmie, MLA barim ki la pynkup burom ia lai ngut ki samla pule kiba la ioh Top 20 ha ka eksam Secondary School Leaving Certificate (SSLC) kaba dang shu dep pynbna shen da ka MBOSE ha kine ki taiew ba la leit. Ki la pynkup burom ha ka sngi rakhe ia ka World Gratitude Day 2025 bad jong ka Mother Mazzarello’s Feast ba la pynlong da ka Sacred Heart Girls HSS ha phyllaw jong ka skul ha ka sngi Hatmajai ka 13 tarik u Jymmang, 2025. Kine ki lai ngut kiba la shah pynkup burom ki long ka Queency Dora Syngkli kaba la ioh kyrdan ba 8 ne Top 8, ka Bameiaineh Kharwar kaba la poi Top 15 ne kyrdan ba 15 bad ka Daphilasara Syiemlieh kaba la ioh Top 20 ne kyrdan ba 20, kiba la ioh pdiang da ki momento ryngkat ka song pisa ba la ai da ka skul bad bah PT Sawkmie.

La pyniphuh iphieng ia kane ka sngi da ki jingrwai, jingshad bad ka skit na ki khynnah skul. Haba ai jingkren u bah PT Sawkmie u la pynpaw ia ka jingkmen ba u la ioh ban ia don lang ha kane ka prokram pynkup burom bad u la ong ba naduh ki por ba la leit u don ka jingiadei kaba jan bha bad kane ka skul, na iwei i principal sha kiwei pat.U pynpaw ruh ba kane ka jingpynkup burom ka long ban ai mynsiem ia ki samla pule kin iai bteng ban leh bha ha ka jingpule jong ki bad ban pynshlur ruh ia kiwei ba kin trei shitom ban pule tista ban pass bha kum kine ki lai ngut.

U kyntu jur ruh ia ki khynnah, ia kaba u la ong, haba kine ki lah balei ma ki kim lah, kaba mut ba ma ki ruh ki dei ban lah ban pynpass bha ia ka eksam jong ki.Ha kane sngi la ia don lang ruh principal Sr. Evelyne Joy Kympat, ki sister, ki nonghikai bad ki khynnah skul.Ia ka World Gratitude Day la ju rakhe ha ka 26 tarik u Iaiong, hynrei na ka jingkhlad noh u Kpa Bakhuid u Pope Francis la rakhe noh mynta ka sngi Hatmajai ka 13 tarik u Jymmang, 2025.