Pynkup ka Seng Khasi Morning School ia ki nonghikai ba shakri 25 snem

Ka Seng Khasi Morning School, Jaiaw hynne ka sngi Saitjain ka la rakhe ia ka jingdap Sawphew snem (40) ka jingiaid lynti jong ka ban ai ka jingshakri ha ka pule puthi. Ia kane ka jingrakhe la pyllong ha Seng Khasi Hall, Shillong ha kaba u MLA barim u bah Mohendro Rapsang ula long kum u kongsan ryngkat ka jingdonlang u Headmaster u Babu Snar.S Malngiang lem bad kiwei de ki rangbah, ki nonghikai bad ki khynnah skul. Ia ka skul Seng Khasi Morning School la seng ha ka 1 tarik Lber 1985, da ka jingthmu ban ai ka jingshakri kaba paka sha ki khynnah pule khamtam ki wan na ki longiing kiba duk.

Ka jingseng ia kane ka skul ka la ai jingiarap sha kiba bun ki khynnah,  watla ka dei ka skul kaba bun ki khynnah ki wan na ki longiing kiba duk, hynrei ka ju don beit ki khynnah kiba poi sha ka kyrdan ba hakhmat ha ka jingpule. U kongsan u bah Mohendro Rapsang haba kren ha kane ka jingrakhe ula ai burom kyrpang ia ki nongseng jong kane ka skul kiba la lah ban kyntiew ia kane ka jaka ai jinghikai kumba ka long haduh mynta. Ula pynpaw ka jingkyrmen ba kane ka skul kan nang kiew shaphrang katba nang iaid ki sngi.

Ha kajuh ka por, ka skul ka la pynkup kyrpang ruh ia ki nonghikai kiba la shakri 25 snem shaneng bad kiba la shongthait na ka kam hikai ha kane ka skul bad la pynkup burom kyrpang ruh ia ki khynnah kiba la pass ha ki eksamin matrik. Ha kane ka sngi, la pynphuh pynphieng ia kane ka jingrakhe da ka jingrwai ka jingshad, bad ka jingpyni riam tynrai ba la iashim bynta ki khynnah kane ka skul.