Pynkut da ka jingplie jaka pynlang um ha Umtung

Ki bor ka tnad Soil and Water Conservation, Nongpoh Division, Ri Bhoi District, ki lah ban pynlong ia prokram ban pynkut noh ia ka Watershed Yatra kaba dei ka prokram pynbna paidbah halor ka jingdonkam ban sumar ia ki tyllong Umdih umbam hapoh ka Pradhan Mantri Krishi Sinchayee Yojana, Watershed Development Components (WEC-PMKSY-II) ia kaba la pynlong ha ka shnong Umtung.

Ia kane ka jingiaid lynti ban ai jingshai paidbah lyngba ka Watershed Yatra la sdang ha ka 19 tarik Lber 2025, ha Nongbah Shillong bad ban iaid kylleng kylleng ka jylla lyngba ka kali kaba la shna kyrpang ban pynsngewthuh paidbah halor ka jingdonkam ban pynneh ia ki tyllong um, ki khlaw ki btap bad ka mei mariang na bynta ka jingshngain ka pateng ban wan.

La wan ban shimbynta ha kane ka programme ban pynkut noh ia ka Yatra, da u myntri ba dei peit ïa ka tnad Soil & Water Conservation u Marcuise N Marak, ha kaba la sakhilang ruh da u Additional Deputy Commissioner ka Ri Bhoi District u Raja Brahma, u Dr. R Talang, Block Development Ophisar Bhoirymbong C&RD Block, ki ophisar bad ki khynnah skul.

Haba kren ha kane ka sngi, u Marcuise N Marak, u la ai khublei ia baroh ki ophisar bad ki nongtrei ka Soil and Water Conservation, kiba la lah ban pynurlong ia ka thong kong ka WEC-PMKSY-II lyngba ka Yatra kaba la neh kumba 3 taiew eiei, da ka buh ia ka thong ban pynsngewthuh paidbah halor ka jingkordor jong ki tyllong um, ki khlaw ki btap bad ka mei mariang da kaba ri bad sumar ia ki.

“Ai ba kane ka jingiaid lynti jong kane ka Yatra kan ym kut tang ha ki jingthew ha ka jingjngai hynrei kan kyntiew ruh ha ka jingioh jingmyntoi ha ka jingmut jingpyrkhat kaba iadei bad ka jingialeh ban pynneh pynsah ïa ka mei mariang lyngba kane ka Yatra ka don ia ka jingangnud bad ka thong ban jingpyntip paidbah bad ban khot ïa baroh ban ïa kitkhlieh shimet shimet na bynta ban pynneh pynsah ïa ka mei mariang”, ong u Marcuise N Marak.

Ula ong ruh, ba ka jylla meghalaya ka dei kawei na ka jylla ba rben da ki klaw bad ka jingbun jong ki um hynrei ngim dei ban kheiñ sting pat, ba ngi dei ban don ka jingkitkhlieh kumno ban sumar ia ka khnang ba ka pateng kan ioh jingmyntoi kumba long kiwei ha kane ka juk, da kaba bynrap ruh, ba kyrmen skhem ba lyngba kane ka Yatra kan nang wanrah shibun ki jingkylla ha ka mei mariang khamtam ha kaban pynjyrngam ia ki klaw ki btap.

Ha katei ka sngi la plie paidbah ruh ia ka Pradhan Mantri Krishi Sinchayee Yojana PMKSY, Watershed Development Component (WDC) 2.0 Umket Watershed-WDC-II, bad ka jingpyntip burom ïa ki nongtrei radbah ha kaba ia dei bad ka jingpynneh ia ka mei Mariang (Watershed Warriors) bad la ai khusnam ruh sha ki khynnah skul.