Pynkut noh ka Jowai Co-Operative Urban Bank ia ka lehkmen dap 50 snem

Ka Jowai Co-operative Urban Bank Ltd ba la seng naduh u snem 1976 da ki politician ba don hapoh ka JHADC ka la pynhap pyrda ia ka jinglehkmen dap 50 snem mynta ka sngi ia ka jingshakri ia ki paidbah ha ka jingiadei bad ka kam pisa pilaiñ naduh ban pyllang pisa, ban ai ram bad kiwei ki jingshakri ha ka jingialang ba la pynlong ha District Library Mynthong, Jowai.

Bad ha kane ka sngi pynhap pyrda u Thombor Shiwat CEM JHADC ula long kum u kongsan, u Moonlight Pariat EM JHADC kum u symbud kongsan, ba la donlang ruh u Bison Roy Iano MDC JHADC, u Dolloi Elaka Jowai Puramon Kynjing, ki shareholder member bad kiwei.

U B. Phyrngap Asst General Manager Jowai Co-operative Urban Bank u iathuh ba ka thong ba shakhmat ka bank jong ka long ban ai ka jingshakri ba kham bha, ban pynkhlaiñ ha ka liang ka technology ban pynheh shuh shuh ia ka CBS platform ha ka rukom ban shngaiñ ki paidbah.

Ki la rai ruh ban rung hapoh ka umbrella organisation kawei na ki organisation jong ki urban co-operative bank hapoh India baroh kawei khnang ban ioh bun ki jingmyntoi na ka bynta ban pynkhlaiñ ia ka bank.

U symbud kongsan Moonlight Pariat haba kren u iaroh ia ka jingiaid lynti kane ka bank, u kyntu ruh ia ki nongtrei ban leit iakynduh bad ki customer sha ki shnong ki thaw jong ki na ka bynta ban pynkiew ia ka bank, namar da kaba shu shong ap ban wan hi ki briew yn ym kloi kiew ka bank.

Na ka liang u kongsan pat u Thombor Shiwat kum uba juh ia dei kam bha ha kane ka bank, u iaroh ia ka rukom ai jingshakri kane ka bank sha ki paidbah, namar ba da lade hi ruh u shem ba dei kaba lah bha ban iarap ia ki paidbah ha kino kino ki bynta ba donkam ha ka por ba biang ba stet bad ki paidbah ruh ki suk bha ban leit donkam sha ka.

Haba kitbok kitrwiang ia kane ka bank ba kan nangkiew na ki por sha ki por, u kyntu ruh ia ki nongtrei ban ialeh pynneh ia ka akor ba bha khnang ban sngewtynnad ki paidbah ba wan donkam.

Ha kane ka sngi u kongsan Thombor Shiwat ula pyllait paidbah ruh ia ka souvenir jong ka jinglehkmen dap 50 snem ka bank, ula ot ia u cake ula pynhap ia ka pyrda jinglehkmen bad pynbna ruh ba ia kane ka jinglehkmen Golden Jubilee la pynkut ha kane ka sngi.