Pynkylla u Rangbah ia ki krem Dewiong sha ka jaka rep ha shnong Moopala

Uwei u ryngbah naka shnong Moopala East Jaiñtia Hills District ba kyrteng u Self Denial Lyngdoh dei uwei u ryngbah bala shim iaka sieñjam ban pynkylla dur iaka jaka ba u juh trei dewiong mynshwa sha ka jaka rep soh ñiamtra ba itynnad bha kaba don ruh ki pung, ki jingkieng iaid kjat, kumjuh ki jait dieng bapher bapher ba ula thung lang ha sawdong kane ka jaka.  Kane ka jaka jong u ka don ha shnong Moopala hi kaba heh kumba 35 hectar tam ei ei, bad  mynshwa ha kane ka jaka u trei dewiong haduh kumba 16 tylli ki krem. Hynrei hadien ka jingkhang tih dewiong ka NGT, naduh u snem 2015 ula sdang ban pynkylla dur noh iaka sha ka jaka rep soh ñiamtra, bad haka jingiaid lynti jong u ryngkat ka  jingiarap ka tnat Horticulture, ka tnat Water Resources, East Jaiñtia Hills District bad ruh ki 12 ngut ki nongrep ba iatreilang hapoh ka kynhun S.D. Lyngdoh & Society Khasi Mandarin Farm, mynta ki tynrai soh ñiamtra bala thung kila kot shaka 20,000 tynrai.  Kumta ban sngewthuh shuh shuh halor ka jingjop kane ka kam hynne ka sngi 06/12/24, lyngba ka Press Tour bala pynkhreh daka  tnat Directorate of Information & Public Relations Meghalaya Shillong, kaba la ialam iaki nonglum khubor sha katei ka jaka la iohlad  ban iakren bad u trai kane ka jaka kumjuh ki ophisar ka tnat  Water Resource ba kynthup u K.Lamre Excutive Engineer, R Tongper Junior Engineer, nangta u ophisar ka tnat Horticulture u D.B.Dhar District Horticulture Officer Khliehriat.

Haba iakren bad u Self Denial Lyngdoh trai jaka u iathuh ba naduh u snem 2003 ula trei dewiong ha kane ka jaka, hynrei ula sangeh noh ha u snem 2014 bala khang ka NGT. Kumta ha u 2015 ula sdang ban pynkylla jaka rep da kaba thung shwa khyndiat ki tynrai soh bad haba iohi ba ki im ki san u sa khot paralok ban sdang iaka kynhun da kaba ai bynta iaki ruh ban rep ha kane ka jaka jong u namar tang marwei um lah. U iathuh ruh ba haka por ba u leit mih kum u nongrep shaka ophis Horticulture  ban pan iarap ki symbai soh bad kiwei, hangta sa poi iakren ba ka don ka skhim sorkar ba lah ban ioh jingiarap kumta naka liang ka tnat kala leit jurip bad lap ba ka jaka ka long biang naduh ka jingheh ka jingbiang um kumjuh, kumta ka tnat Horticulture kala bei pisa bad la pyntrei pat daka tnat Water Resources. U R.Tongper Junior Engineer Water Resources u ong, ia kane ka project la tip kum ka  Madan Mookhlot Minor Irrigation Project kaba hap hapoh ka Pradhan Mantri Krishi Sanchaye Yojna, Per Drop More Crop PMKSY- PDMC bad la pyntrei haka mang tyngka ba  42,45300 jong u snem 2019-2020, la pyndep pat ha u snem 2022-2023. Ki jingpyntrei kynthup ka pung, ka jingkieng iaid kjat nalor ka pung, ki top pyllang um barit bad baheh 9 tylli, ki  pipe lines ba 1.14 km, ki pump ban tan um napoh pung 2tylli kawei ka solor pump 3hp, diesel pump 5hp.

Na ka liang u D.B.Dhar District Horticulture Officer Khliehriat u iathuh baka ophis jongki ka ai jingiarap ruh ki symbai soh, sboh, drip irrigation facilities, control mature kum u shun, dawai khñiang, nangta ka nursery bad kiwei da kaba ialeh  ban kyntiew iaka rukom rep khang ba kan long nuksa ia kiwei khamtam sha kine ki thaiñ ba juh trei dewiong ba bun kiba ong ymlong rep shuh. Haba ia dei bad ka iew ka hat u Self Denial Lyngdoh u ong tang u soh ym pat ih ruh la don  ki briew ba wan pan thied, bad dangshen naki soh ba ula thung shwa  u la lah die kumba 2 lak tam ei ei. Katba kiba dangrit pat u ong dang hap ban ap iaka por  namar shimpor haduh 8 snem tam ei ei ban ioh kheit ia u soh. Haba iadei bad kane ka kam jong u, u buh jingkyntu ia kiwei ruh ban mih shakhmat kumba leh ma u namar u lap ba wat ka jaka ba tih dewiong ruh kam don jingeh ban rep ban riang ne pynjyrngam biang iaka.