Pynlong ka CBC ia ka jingialang iamir jingmut halor ka jingkhuid bad ki jingbam tei met

Ka Central Bureau Communication (CBC) Shillong, ka la pynlong ïa ka prokram ai jinghikai halor ka Swachhata bad ka bam ba tei ia ka met ha skul Clear Springs mynta ka sngi, kaba ïahap bad ki jingthmu jong ka Swachh Bharat Mission bad ka POSHAN Abhiyaan.

Ha kane ka prokram pynlong ia ki jingiakop kyntip bad iakop dro dur khnang ban kyntiew ha ka rukom ki jingiakren kaba phylla. Ki samla pule ki la iashim bynta da ka jingshitrhem da kaba pyni ia ka jingsngewthuh jong ki lyngba ki jubab bad ki jingdro jong ki.

Hadien la ioh ban sam khusnam sha ki nongjop ban pynshlur ia ka jingbteng ka jingiashim bynta ha ki prokram.

Haba ai jingkren sha ki samla pule kaba pyndonkam da ki nongmuna kum ki nuksa ba lah ban iohi bad sngewthuh, ka Kong Palvy Dora Lyngdoh, IEC Specialist ka Tnad kam pynroi sor, ka la ai jingkren shaphang ka jingkhuid jingsuba bad ka rukom pynkhuid ia ki jaboh jabaiñ da ka jingkitkhlieh.

Ka la batai bniah shaphang ki kyndon jong ka Solid Waste Management Rules, 2016, da kaba pynleit jingmut ha ka jingpynkhuid ïa ki jaboh katkum ka jingstad saian bad ban jur ïa ka jingdonkam ka rukom pynkhuid ia ki jaboh ha ka rukom ba iahap katkum ka juk mynta lyngba ka jingpyniakhlad ia ki jaboh.

“Ka niut jong nga, ka jingkitkhlieh jong nga,” la ong ka Kong Palvy Dora bad pynshlur ia ki samla pule ba don ka jingkitkhlieh ia ka mariang ha ka jingim ba man ka sngi.

Ka la ong shuh shuh ba ki jaka pule ki don ka bynta ba kongsan ïa ki rukom pynkhuid ba ryntih, ban pynthikna ïa ka jingpynïapher ïa ki niut ha ka rukom kaba dei bad ban kyntiew ïa ki sienjam ba ïalam ïa ka imlang sahlang.

Ka Kong Odalin Sumer, Medical Health Officer ka East Khasi Hills ka la ai jingkren halor ka jingbam tei met bad ka rukom bam. Ka la ban jur ïa ki jingbam ba tei met ba lah ban ïoh ha ka thain ha ki jingbam ba man ka sngi bad ka jingdonkam ia ka prokram Weekly Iron and Folic Acid Supplementation (WIFS) kaba ïada na ka jingduna snam ha ki khynnah samla bad kyntiew ïa ka koit ka khiah bad ka bor pyrkhat.

Ia kane ka prokram la pynlong ha ka jingiadonlang ka Principal jong ka skul ka Kong Majella Badwar kaba la ïaroh ïa ka sienjam bad pynpaw ka jingkmen ba ki samla pule ki ïoh ïa ka jingtip ba kordor halor ka jingkhuid bad ka jingbam batei ia ka met ki long kiba kongsan ha ka jingim ba man ka sngi.

Ha ka prokram la shm bynta ki nonghikai bad ki samla pule kaba long kum ka rynsan ban pynphriang ia ki lad hikai shaphang ka jingkhuid ban ioh ia ka jingkoit jingkhiah.