Pynlong ka CPS-AS ia ka ‘Indo-Japan Dialogue’ ban kyntiew ia ki nongrep

Da ka jingangnud ban nang wanrah ia ka jingkylla bad ka jingkyntiew ha ka liang ka kam rep kam riang bad kiwei kiwei ki kam pynroi hapoh ka Thain Shatei Lam Mihngi khamtam ha ka jylla Meghalaya bad Assam, na ka liang ki bor ka College of Postgraduate Studies in Agricultural Science (CPS-AS), CAU-Imphal, Umiam ka la ioh ban pynlong ia ka prokram ban iathir jingmut ia kaba la tip kum ka ‘17th India-Japan Dialogue on Economic Developments’, ia kaba la pynlong ha kane ka College. Lyngba kane ka prokram, ha kaba la wan ban ia shimbynta ruh da ki nongmihkhmat bad ki riew shemphang napoh ki 5 tylli ki skulbah jong ka ri Japan la ioh ban ia mir jingmut ha kiba bun tylli ki bynta kumno ban pynneh ia ka jingiadei paralok ruh hapdeng ka ri Japan bad ka India nalor ban wanrah ia shibun ki kam pynroi bad ka jingkyntiew ia ka kam rep kam riang ban pynmyntoi ia ki paid nongrep. La pynlong ia kane ka 17th Indo-Japan Dialogue on Economic Developments da ka jingiasnoh ktilang ki bor ka skulbah Central Agricultural University (CAU), Imphal, ka Indian Society of Agricultural Economics Mumbai, Kobe University na Japan, ka Centre for International Projects Trust New Delhi lem bad ka jingiatreilang ruh da ka sorkar Meghalaya.

La wan ban ia shimbynta ha kane ka programme, da u Dr Anupam Mishra, Vice-Chancellor ka Central Agricultural University (CAU), Imphal, u Gunanka D.B IFS, Joint Secretary, ka tnad Agriculture & Farmers’ Welfare ka Meghalaya, u Dr. V K Mishra, Director, ICAR-RC for NEHR, Umiam, Meghalaya, u Dr. AK Mohanty, Director, ICAR-ATARI, Zone- VII, Umiam, Meghalaya, ka Dr. P. Lyngdoh, Director I/c Veterinary Office, Nongpoh lem bad kiwei ki ophisar. Na ka liang kiba la shah khot sngewbha ban ia tai napoh ki 5 tylli ki skulbah na ka ri Japan, ki riew shemphang kiba la poi ki kynthup ia u Prof. Takahiro Sato, Vice-Director, RIEB, Kobe University, u Prof. Atsushi Kato, Waseda University, Japan, Prof. Kazutoshi Tamari, Chukyo University, Japan, Prof. Asuka Yamamoto, Kyushu University, Japan, Dr. Ryohei Kasai, Gifu Women’s University bad Prof. Mio Morimoto, Waseda University. Haba kren bad ki Nongthoh Khubor, na ka liang u Dean ka CPSAS, Umiam, u Dr. D. Thakuria bad u Prof. Takahiro Sato na ka Research Institute for Economics and Business Administration, Japan, ki la pynpaw ia ka jingkmen kaba khraw ban ioh ia kum kane ka prokram ban ia mir jingmut halor ki shibun tylli ki mat kumno ban wanrah ia ka ioh ka kot kaba bit kaba biang ha kiba bun ki liang khamtam ruh ha kaba ia dei bad ki kam rep kam riang na bynta ka jylla Meghalaya bad Assam.

Ki la iathuh ruh, ba lyngba ka prokram ka la plie lad plie lynti ruh kumno ban ia sam lem ia ki jingwad bniah kiba la wanrah da ki riew shemphang kiba la ia shimbynta ban lah ban thaw ia ki lad ban pynurlong ia ka thong ban kyntiew ia ka ioh ka kot bad khamtam ban nang wanrah ruh ia ka jingiajan hapdeng ka ri Japan bad ka India ban ia trei ryngkat ryngkat ha kiba bun ki bynta na bynta ka jingbit jingbiang jong ki paidbah jong kine ki ar tylli ki jylla jong ka thain shatei lam mihng