Pynlong ka ophis DC Jowai ia ka Iew ban kyntiew ia riew donsap

Ka iew ia die ia thied ba lai sngi lynter ba pynlong da ka ophis u Deputy Commissioner, West Jaiñtia Hills District ha madan Jrisaleiñ Jowai halor ka thong ban kyntiew ia ki briew ka thaiñ bad Jylla ka la sdang hynne ka sngi da ka jingwan shim bynta shongshit ki paidbah na ki tnat treikam sorkar bapher bapher, ki Village Organisation, ki riew shimet bad kiwei. Ha kane ka iew la don haduh kumba 120 tylli ki dukan ba shim bynta kynthup kiba wan die ia ki mar rep ba dang shu dep kheit hadien ba la pynrkhiang, nangta ki tiar ki jaiñ ba ki shna bad thaiñ hi, ki jingbam jingdih bapher bapher ba ki shet hi, ki stall ai jingtip ba ia dei bad ka laiñ pule puthi, kumjuh ki lad iohkam iohjam.

Shuh shuh la don ruh ka jingpyni ia ka sap tem sap rwai, shad tynrai bad kiwei. Ia kane ka iew ia die ia thied la wan ban plie da u MLA ka 2-Jowai Constituency u Wailadmiki Shylla ryngkat ka jingdonlang u DC bad SP ka West Jaiñtia Hills District u B.S.Sohliya, u S.Syrti, ki ophisar sorkar bapher bapher bad kiwei. U Wailadmiki Shylla haba kren ha ka jingialang plie, u ong kumba  kane ka iew ia die iathied dei ka rynsan na ka bynta ban  kyntiew ia ki nongrep, ki riew don sap bad ruh ia ki khun samla ba kin ioh jingtip ia ki lad ioh kam iohjam, u kyntu ba kin iamir jingmut bad sam kylliang ki jingnang jingtip bad ruh ban pdiang sngewbha da ka durkhmat ba phuh samrkhie ia ki briew ba wan mih ha ki dukan jong ki.

U kyntu ruh ia ki samla ban shim kabu ia ki lad ki skhim ba wanrah ka sorkar khnang ba kin lah kyntiew ia ka kam ne ban sdang ieng ha la ki jong ki kjat.  Kumta u khmih lynti ba kane ka iew iadei iathied ha kine ki lai sngi lynter kan long kaba pynmyntoi ia ki paid ba die tiar kumjuh kiba wan thied. Ha kane ka sngi la ioh lad ruh ban iakren bad ki katto katte ngut ki paidbah ba shim bynta ha ki stall bapher bapher.