Pynlong Ka SAN-KER da ka Panel Discussion ha ka ‘World Suicide Prevention Day’

Ka SAN-KER haka jingïatreilang bad ka Community Based Rehabilitation Forum ka KJP Synod Sepngi ha ka 10 tarik,nailur 2025 kaba dei ruh ka World Suicide Prevention Day, ka la pynlong ïa ka Panel Discussion halor ka phang kaba ong ‘Change The Narrative’. Ïa kane ka Panel Discussion la pynlong ha Auditorium jong ka Khadsawphra Kolej Mairang ha ka jingïadonlang ka Deputy Commissioner ka Eastern West Khasi Hills District ka kong Anita Kharpor kum ka kongsan. Ha ka Panel Discussion la ïa shim bynta da u Dr.Boldness Lyngdoh Nongum, principal ka 14-8 College Mairang, u Pastor JR Kharmawlong, pastor ka Mairang Presbytery, u bah PS Marwein, DSP ka Eastern West Khasi Hills District, u Dr. Eddie Mukhim, Psychiatrist SAN-KER bad u bah Lastborn Myrthong, ADC ka Eastern West Khasi Hills District. La pynïaid ïaka Panel Discussion da u Rev. VTS Langstieh, secretary Bible Society of India, Shillong Auxiliary bad nalor ka jingïatai ki panelists, ki samle pule naki skul bad ki kolej bapher bapher kiba la wan sha kane ka program kila ïashim byntalang da kaba buh ïa ki jingkylli ïa ki panelists.

Ka Kong Anita Kharpor haba kren kum ka Kongsan kala ong ba katkum ka report ha baroh kawei ka pyrthei man la ka 40 second ki don kiba dkhat jubor ne kiba pyrshang ban dkhat jubor ïa la ka jingim bad ka la dei ka por ba ngin kren eiei ban ïada ïa kane. Kala ong ruh haba peit ha kine ki sngi ka jingdkhat jubor ïa la ka jingim ka ju jia bha ha ki khynnah 14 snem haduh ki samla 30 snem, kala ong ba ki don shibun ki daw balei ka jingdkhat jubor ïala ka jingim ka jur ha kine ki arta bad kawei naki ka dei ka jingshitom jingmut (stress). Ka Kong Anita Kharpor kala ong, ba ka long kaba donkam ban hikai ïaki khynnah bad ïaki samla kumno ban pynbeit ïaka jingshitom jingmut ne ïaki jingeh hynrei kaba sngewsih ka long ba ki kmie ki kpa bunsien ki long ka daw ba ki khun kin ïoh ïaka jingpang shitom jingmut namar ba bun ki kmie ki kpa ki kwah ba ki khun jong ki kin leh katkum ka jingkwah jong ki khlem da pyrkhat la ki khun jongki, ki don ne em ïaka mon ban leh ïa kata ne ki lah ne em ban leh kumba kwah ki kmie ki kpa.

Kala ong, to ngin ym im ïaka jingangnud jongngi lyngba ki khun jong ngi, hynrei ai ba ki khun kin im haka jingangnud jong ki katkum ka jinglah, ka jingkotbor bad ka jingsngewtynnad jong ki bad ngin dei ban pynbor ïa ki, la ka long haka pule ka puthi ne ha kiwei pat ki bynta ha ka jngim. Ka kong Anita Kharpor ka la pynkut ïa ka jingkren da kaba ong, U Blei ula thaw ïa u briew hala ka jong ka jong ka jinglong kyrpang bad kadei ka kamram jong ngi ban sumar ïa kata ka jingai sngewbha jong u Blei bad ngim lah ban shim ïa ka jingim jongno jongno bad namar ba ngim lah ban shim ïaka jingim jong kiwei ngim lah ruh ban shim ïaka jingim lajong namar ka jingim bad ka jingïap ka shong ha ka kti jong u Blei.