Pynlong ka sorkar ia ka tamasa pule puthi ha Nanpolok

U Myntri Rangbah ka Jylla Conrad K Sangma hynne ka sngi Nyngkong, ula plie ia ka Shillong Literary Festival kaba 4, kaba la pynlong ha Nan Palok ne Wards Lake, Shillong. Ha kane ka tamasa la wan iashimbynta da ki nongthoh kot ba pawnam ka ri kiba kynthup ia ka Shobhaa De, u Vikram Seth, ki nongthoh  kot ba pawnam na ka jylla bad kiwei kiwei. U myntri rangbah ula ong ba ka jylla Meghalaya ka don bun ki nongshong shnong kiba dang khynnah ha ka rta haba ianujor ha ka ri baroh kawei, kumta ka sorkar kan ialeh ban pynthikna ba ka pule bad ka thoh ka tar, ka long ka bynta kaba kongsan ban kyntiew ia ki samla ka jylla. Ula ong ba ka thoh ka tar ka long kaba kongsan bha bad kadei ka lad ban buh ha ki jingthoh bad ki kam wadbniah ia ka kolshor ba riewspah jong ka Jylla.

Ula ong ba ka sorkar ka pynshlur ia ki skul ban iashimbynta, namar kane kan long kum ka jingai jingtip bad ka jingbtin ia ki khynnah skul ban saindur ia ki sap jong ki. U Conrad ula batai ruh shaphang ka CM Scholars Prokram, kaba dei ka prokram kaba kyrshan ia 50 ngut ki Nongwad bniah ban buh jingthoh ia ki kolshor jong ki jaidbynriew trai ri trai muluk ka jylla. Ula iathuh ruh ba ka Sorkar Jylla kan kynshew pisa haduh T.4000 klur ban tei ia ki jingtei bapher bapher ha ka kam jngohkai kaba kynthup ia ki Hotel, Homestay bad kiwei kiwei ban kyntiew ia ka kam jngohkai ha jylla.

Lah ban kdew, ba ka jingpynlong ia ka Literary Festival ka long ban plie lad ia ki nongthoh kot ka jylla ban pyni iaka sap kyrpang ka jongki bad ba kin ioh ia ka jingiatreilang bad ki nongthoh kot kiba pawnam kiba na kylleng ka ri.