Pynpra ka KSU ia ka ktem khaii drok ba sah be-ain ki mynder ha Paltan Bazar

Ki dkhot ka Khasi Students Union hynnin ka miet nyngkong, ki la leit khynra bad pynpra ia ka jaka sah be-aiñ ki mynder hajan Parking ka Paltan Bazar (Cantonment) bad la lap ia ki mynder ba sah ki dei ki bym don kot satia bad ki la pynkylla ruh ia katei ka jaka kum ka ktem khaii drok, kynja bad kiwei ki jingdih pynbuaid.Katkum ka kyrwoh na ka seng KSU kala pyntip ba ha kane ka miet haba ki dkhot ka KSU kila pynlong ia ka jingkhynra ia katei ka jaka kaba don hajan ka shnong Mawbah bad Nongsohphoh Upper Mawprem kala lap ia ki mynder ri ba kila sah be-ain ha katei ka jaka bad kim shym la don satia ia kino kino ki kot ki sla kiba biang kum ki Epic bad kiwei kiwei.

Ki la lap ruh ba nalor ka jingjaboh bad ka jingsma iwtung jong kane ka jaka, la lap ruh ba ha kitei ki iing kiba la shu shna bad sop da ki synduk kot bad plywood la shem ba kila don ruh ki nongkhaii ia u droks, kynja bad ki jingdih pynbuaid.Ka KSU kala lap ba kila don kumba 50 ngut kiba shong basah be-ain ha katei ka jaka bad kumta kala phah lum ia ki tiar ki tar bad beh noh ia ki na katei ka jaka kiba kynthup ia ki nongkhaï drok, kynja, ki nongbylla beaiñ ki bym don ia ki kot ki sla bad kila pynpra noh ia kitei ki jaka sah kiba la shna be-ain.Ka KSU kala pynpaw ruh ba ka jingtlot bad ka jingbym don ka Ain̈ kaba paka ban khanglad ia ki poiwir kan buh jingma ia ka Jaitbynriew rit paid, namar ki lah ioh ban rung laitluid khlem don ki nongpeit nongjngoh bad kala dawa na ka sorkar ba kadei ban kyndit bynriew noh shwa ba ka por kan dier bad dawa ba dei ban pyntreikam noh ia ka ILP ban iada ia ka jaidbynriew na ka jingshah tyllep ha ki poiwir.

Ka KSU ka la pynpaw ruh ia ka jinglyngngoh, ba kumno hapdeng Iew kine ki mynder ki ioh ban sah be-aiñ bad ki bor ka aiñ kim iohi eiei bad kine ki mynder kila pynkylla ruh ia katei ka jaka kum ka ktem ban khaii ia u drok bad kiwei kiwei ki jingdih pynbuaid.