Pynrem ka Congress ba shah thombor ki Khristan ha India

Ka Meghalaya Congress Pradesh Committee (MPCC) hynne ka sngi ki la pyllong ia ka jingialang ha Don Bosco, Shillong ban pynrem jur ia ka jingshah thombor ki riewngeit Khristan ha kylleng ki jaka jong ka ri India. Ha kane ka sngi, ki nongialam ka Congress ryngkat ki paidbah ki la pynpaw ia ka jingpyrshah bad kila rah ruh ia ki plakad ban pynpaw ia ka jing pynrem jur halor ka jingjur ki kam shah thombor ki Khristan.Lah ban kdew ba dang shen arngut ki sister jong ka Balang Catholic na Kerela kiba la tip kyrteng kum ka sister Vandana Francis bad ka Sister Preety Mary kidei kiba trei ha Fatima Hospital Agra, ki la shah kem ha ki pulit Chhatiisgarh ha ka 26 tarik Naitung ha Durga Railway Station halor ka jingkynnnoh ba ki pynkylla niam jubor bad ki khaii briew.

Ha kane ka sngi, ki nongialam Congress kila pynrem ia ka sorkar NDA ba ialam da ka BJP bad la kam ba naduh ba synshar ka BJP , ki mih ki jingshah thombor jong kiba bun ki riewngeit khristan ha kylleng ki jaka jong ka ri.U bah Manuel Badwar haba kren ha kane ka sngi, ula ong ba ha kine ki 12 snem, la iohi ba ka jur ka jingshah thombor ha India kadei namar ba jur ka jingleh politik.“ Ki jingmih ki jingshah thombor ka long kum ki jingleh politik ha kaba lada ki sngew ba kam dei ka jingioh vote ba heh, ki pyrshang ban kthong bad thombor,” ula ong.

Ula ong ba ki don bun ki party kiba ialeh politik bad tang na bynta ban ioh vote, ki la wanrah ka jingsngewpher niam ha ka imlang sahlang ha kaba la wanrah ka jingsheptieng ia ki paidbah.“ Namar ka jingjur ka jingleh politik, ym don shuh ka jingiatylli bad sdang jur ka jingiapait bad pyniaphiah ia ka jinglongtylli jong ki paidbah ha ka ri,” ula ong. Ha kajuh ka por, ula kyntu ia ki paidbah ba kidei ban ieng ban iakhun ia kum kine ki kam shah thombor ba long pyrshah ha ka riti synshar ka ri.