Pynrem u Dr Mukul ia ka sorkar, pulom ki CCTV kamera bym lah tehlakam ia ki kam runar

U Nongialam ka Liang Pyrshah Mukul Sangma ula pynpaw ka jingsngewkhia halor ka jinglong jingman ka shongsuk shongsain ha Meghalaya, khamtam hadien ka jingshah pyniap ki ar ngut ki khynnah. Katkum ka jingong jong u, ka long kaba donkam ia ka jingsngewthuh ba bniah ia jingeh ba don sawdong  ki jingleh beain bad ki kam bymman hapoh ka Jylla.Haba kren sha ki lad pathai khubor u Mukul ula ban jur ba donkam ban pynduh jait ia ki kam runar barit baria, ia kaba u ngeit ba ki lah ban ai mynsiem sha ki kam bymman ba heh.Ula kdew ia ki kam tuh kam thiem, ka jingtuh masi, bad kiwei ki kam runar ki la nangkiew ha ki jaka nongkyndong ha kaba bun sien ki donkti da ki kynhun runar.

U Mukul ula pynrem ia ka Sorkar ba kam shym la lah ban pynkhlain ia ka tnad pulit, haba kdew ia ka jingduna ki briew ka buh jingeh ban tehlakam ia ki kam runar.U la bynrap ba ula iakren ia u Senior Superintendent of Police (SSP) uba la pynsngew ia ka jingeh ha ka jingduna briew, kaba la ktah ia ki pulit ban iakhun pyrshah ia ki kam runar. U Myntri Rangbah barim ula buh jingkylli ruh ia ka jingkut jingmut ka Sorkar ban pyntreikam ia ka Meghalaya Resident Safety and Security Act, ba la pynwandur ban pynkup bor ia ki shnong ki thaw ba kin iatreilang ban khmih ia ki jingeh bad ki lad jingiada ban shngain ki paidbah.

U la kdew ba ki kyndon ka Ain, kum ka jingpyndait ia ki CCTV kamera ha ki jaka ba kongsan, ka dei ka bym pat pyntreikam pura satia. U la pynpaw ruh ia ka jingsngewkhia halor ka jinglait ki kam pulit ha ki Police Station bad battalion, ia kaba u ngeit ba ka dei ka jingleh khnang ban pyndkoh ia ka tnad Pulit.Ula buh jingkylli ia ka jingthmu jong ka sorkar halor ka jingbym lah pyndap briew ha ki kam ba lait, ba pyni ba lehse ka lah ban dei ka lad pynduna ia ka jinglut jingsep lane ka jingbym don jingsngew halor ka jingshngain bad jingiada ka Jylla.