Pynrung kyrteng ka tnad Social welfare ia kiba Duna dkhot met

Ka tnad Social Welfare ka East Khasi Hills ryngkat ka bor district East Khasi Hills bad ka Artificial Limbs Manufacturing Corporation of India (ALIMCO) hynne ka sngi ka la pynlong ia ka jingpynrung kyrteng ia ki briew kiba duna dkhot na ka bynta ban sam ia ki tiar jingiarap jongki lyngba ka skhim ka sorkar India, ka Rashtriya Vayoshri Yojana (RVY) ha State Central Library, Shillong. Kane ka skhim RVY jong ka sorkar pdeng ka ai jingiarap ia ki briew kiba duna dkhot met bad ki tymmen kiba la 60 snem shaneng kiba hap ha u lain ka jingduk ne Below Poverty Line (BPL). Haba kren bad ki katto katne ngut ki longkmie ki longkpa kiba don jingduna ha ki dkhot met, kila pynpaw ia ka jingsngewnguh ba ki ioh ia ka jingiarap namar ba kim lah ban kot bor nalade namar ka jingduk. Iwei I longkmie iba la don ia I khun bym lah iaid, ila pynpaw ba ka long shisha ka jingkyrkhu ba in ioh ia ki jingiarap na ka sorkar namar ba dalade i shem jingeh ban thied namar ka jingduk.

 “ Nga dap da jingkmen ba nga ioh ia ka jingiarap na ka sorkar namar ba nga don I khun bym lah ban iaid ban ieng. Lyngba kane ka jingiarap ka sorkar nga la kham sting namar nga ioh ia ki kali Wheel Chair,” la pynpaw iwei I longkmie.Ia kane ka skhim la pyntreikam da ka Ministry of Social Justice and Empowerment lyngba ka kompeni ALIMCO.Ka ophisar jong ka Social Welfare ka kong E Kharchandy ka la iathuh ba kito kiba don ka jingduna dkhot met kaba 40 percent shaneng, ki ioh ia ka jingiarap da ki tiar katkum ka jingdonkam jongki katba ia ki khynnah la ai ia ki tiar kiban iarap ba kin nang ban thoh ban pule.

Ka kong Kharchandy ka la iathuh ba ki don 27 tylli ki tiar jingiarap kiba ka ALIMCO ka ai sha kiba duna dkhot met bad haduh ka sngi Hatmajai ki don 1500 ngut kiban ioh jingiarap na kane ka skhim. La iathuh ba ki don 7858 ngut eiei ki briew kiba don jingduna ha ki dkhot met kiba don ha East Khasi Hills District. Ka la ong ba ia kum kane ka prokram la sdang naduh ka 22 tarik Iaiong, 2025 ha man ki Block kiba hap ha ka district.