Pynsangeh ka KHADC ia ka jingthmu pynlong jaka theh niut ha Lumdaitkhla bad Lumsohpieng

Ki bor ka tnad Khasi Hills Autonomous District Council (KHADC) lyngba ka tnad Solid Waste Management mynta ka sngi ki la pdiang ia ka rai jong ki ar tylli ki Dorbar Shnong kata ka Lumsohpieng bad Lumdaitkhla ha Bhoirymbong ban pynsangeh noh ia ka jingthmu ban pynlong ia kawei ka jaka kum ka jaka theh niut hadien ba ka la don ka jingpyrshah kaba jur na kine ki Dorbar Shnong.

Ia kane ka rai, la pdiang hadien ka jingleit jurip ruh sha katei ka jaka kaba hap hapdeng ka Lumsohpieng bad Lumdaitkhla ha Bhoirymbong, ha kaba la shem ba kane ka jaka kam iahap satia ban pynlong kum ka jaka theh niut katkum ki kyndon ban bud thik ia ka Solid Waste Management (SWM).

Ha kane ka jingleit jurip biang sha katei ka jaka, na ka liang ki ar tylli ki Shnong la ia donlang da u Bah Hamjngai Hinge Rangbah Shnong ka Lumsohpieng, u Bah Tennyson Buiam Rangbah Shnong ka Lumdaitkhla lem ki dkhot jong ka Executive Committee, katba na ka liang ka KHADC la wan da u Bah FS Syiem, kum u Secretary lem bad ki ophisar na ka tnad MSPCB.

Na ka liang ki arngut ki Rangbah Shnong ki la pynpaw, ba ki nongialam Shnong lem bad ki paidbah ki la pyrshah jur ia kane ka jingthmu, wat la katta ka la don ka jingsieh ia u mawnongrim ha ka por ba dang long MDC ka Umroi Constituency u Bah R. Kharbuki ha ki snem 2020-21 lyngba ka Tied Grant jong ka Solid Waste Management.

Ki la iathuh ruh, ba kam shem la don ka jingmynjur satia ban pdiang ia kane ka jingpynmang skhim na bynta ka jaka theh niut ha katei ka jaka, namar kane ka jaka ka dei kaba don ia ki tyllong umdih umbam bad ruh kaba ki paidbah nongshong shnong jong kine ki ar shnong ki hap ban shaniah ia ka um ban sum ban sait na kane ka jaka bad lada pynlong ia ka kum ka jaka theh niut kan sa pynjakhlia ia ka mei mariang namar kane ka jaka kam iahap satia katkum ki kyndon aiñ.

Shuh shuh ki la iathuh, ba ha kane ka jingleit jurip na ka liang ki bor jong ka MSPCB ruh ki la batai shai ba kane ka jaka kam iahap satia ban pynlong kum ka jaka theh niut katkum ki kyndon, kumta hadien ka jingiaphylliew jingmut kaba shai halor ka rai ban pyrshah la pdiang ban pynsangeh noh shisyndon ban pynlong jaka theh niut ia katei ka jaka.